गोव्यात वाहतूक नियंत्रणासाठी GoVA प्रणाली सुरु
पणजी l –
गोवा राज्य सरकारने राज्यातील वाहतूक व्यवस्थेत पारदर्शकता आणि नियमांचे काटेकोर पालन सुनिश्चित करण्यासाठी मोठा निर्णय घेतला आहे. आज ९ डिसेंबर २०२५ पासून केरी, पत्रादेवी आणि पोळे या महत्त्वाच्या चेकनाक्यावर Goa Vehicle Authentication System (GoVA) ही अत्याधुनिक इलेक्ट्रॉनिक तपासणी यंत्रणा सुरु झाली आहे.
GoVA प्रणाली वाहनांची ओळख, नोंदणी, पूर्वीचे दंड, विमा, पोल्यूशन प्रमाणपत्र यांसारखी सर्व माहिती अधिकाऱ्यांना मोबाईल डिव्हाइसवर तत्काळ उपलब्ध करून देते. यामुळे तपासणी प्रक्रिया जलद, पारदर्शक आणि तांत्रिकदृष्ट्या सक्षम होईल. राज्य वाहतूक विभागाने स्पष्ट केले की या इलेक्ट्रॉनिक पद्धतीमुळे मानवचुकीची शक्यता कमी होईल आणि नियमभंग होण्यापासून रोखता येईल. अधिकारी ‘GoVA’ ॲपद्वारे एका क्लिकवर वाहनाची सर्व माहिती पाहू शकतील.
यामुळे वाहन तपासणी प्रक्रिया पूर्णपणे डिजिटल होणार असून हाताने तपासणी करण्याची आवश्यकता कमी होणार आहे. नियमभंग झाल्यास तात्काळ डिजिटल दंड आकारला जाईल आणि सर्व व्यवहार ऑनलाइन पारदर्शक पद्धतीने नोंदवले जातील. बनावट दस्तऐवज किंवा नंबर प्लेट ओळखणे सुलभ होणार असून, रोख व्यवहारांवर पूर्ण विराम लागणार आहे.
सिस्टमच्या अंमलबजावणीसाठी वाहनधारकांनी आपले विमा, PUC, फिटनेस प्रमाणपत्र आणि परवाना अद्ययावत ठेवणे आवश्यक आहे. तसेच कोणताही प्रलंबित दंड असल्यास त्याची पूर्वीच भरपाई करणे आवश्यक आहे.
गोवा सरकारच्या या निर्णयामुळे राज्यातील वाहतूक नियंत्रण अधिक सक्षम आणि आधुनिक होईल, तसेच नियमभंग करणाऱ्यांवर कठोर कारवाई करता येईल अशी अपेक्षा व्यक्त केली जात आहे. डिजिटल तंत्रज्ञानाच्या मदतीने वाहतूक व्यवस्था सुधारण्याचा हा मोठा टप्पा मानला जात आहे, ज्यामुळे प्रवाशांना सुरक्षितता आणि नियमपालन सुनिश्चित करण्यास मदत मिळेल.