चालकाचा ताबा सुटल्याने कार एडगाव येथील पुलावरून कोसळली;गाडीचे मोठ्या प्रमाणात नुकसान; चालकासह प्रवासी जखमी
प्रतिनिधी- मंदार चोरगे
वैभववाडी – वैभववाडी तालुक्यातील एडगाव पाष्टेवाडी येथे पहाटेच्या सुमारास लक्झरी बस जळुन खाक झाली या घटनेला एक दिवस होत नाही तोच आज पुन्हा वैभववाडी एडगाव येथील सुक नदीवर कार पुलावरून कोसळल्याची घटना घडली. जिप कंपनीची कंपास नावाची MH04KW6343 हि गाडी विनय बालचंदानी यांची आहे.
मुंबई येथील पर्यटक कोल्हापूर मार्गे दोन कारने गोव्याकडे निघाले होते. सकाळी ११ ते ११.३० च्या सुमारास त्यांची गाडी एडगाव सुक नदीवरील पुलाजवळ आली असता चालकाचा गाडीवरील ताबा सुटल्याने कार पुलाशेजारील लोखंडी ग्रील तोडून नदिपात्रात कोसळली. या अपघातात गाडीतील चार पर्यटक जखमी झाले तर कार चालक गंभीर जखमी झाला आहे.
गाडी नंबर- MH04KW6343 गेल्याच महिन्यात ४ जानेवारी रोजी त्यांनी ही गाडी विकत घेतली होती. आज बरोबर एक महिना होत असतानाच या गाडीला अपघात झाला आहे.स्थानिक नागरिकांची व पोलिस प्रशासनाने जखमींना वैभववाडी ग्रामीण रुग्णालयात उपचारासाठी दाखल केले. गाडीतील एअर बॅग मुळे सुदैवाने या अपघातात जीवितहानी झाली नाही. या अपघातात कारचे मोठे नुकसान झाले आहे. घटनास्थळी बघ्यांची मोठ्या प्रमाणात गर्दी होत आहे. या घटने बाबत अधिक तपास वैभववाडी पोलिस करत आहेत.