रत्नागिरी- स्वप्नाली सावंतचा खून केल्याची कबुली तिन्ही संशयितांनी दिली आहे. तसेच घराच्या आवारात ज्याठिकाणी तिला जाळण्यात आले त्या ठिकाणापासून काही अंतरावर तिची 8 ते 10 अर्धवट जळालेली हाडे, राख आणि जाळलेल्या ठिकाणचा काढून टाकलेला कोबा जप्त करण्यात पोलिसांना यश आले. यातील राख, हाडे आणि स्वप्नालीच्या मुलीची डिएनए चाचणी केलेला अहवाल काही दिवसांमध्ये प्राप्त होणार असून या खूनाशी संबंधित अन्य पूराव्यांचा शोध आणि सखोल चौकशी करण्यात येणार असल्याची माहिती जिल्हा पोलिस अधिक्षक मोहित कुमार गर्ग यांनी पत्रकार परिषदेत दिली.
या खूनाप्रकरणी पोलिसांनी स्वप्नालीचा पती सुकांत सावंत,त्याचा चुलत भाउ रुपेश सावंत आणि कामगार प्रमोद गावणंग यांना अटक केली असून ते पोलिस कोठडीत आहेत. या तिघांनी पूर्वनियोजन करुन शांतपणे 1 सप्टेंबर रोजी सकाळी 11.30 वा. स्वप्नालीचा गळा दोरीने आवळून खून केला. त्यानंतर संध्याकाळ पर्यंत तिचा मृतदेह झाकून अंधार पडल्यानंतर पुरावा नष्ट करण्याच्या उद्देशाने घराच्या आवारातच पेंढा आणि पेट्रोल टाकून जाळला. जाळल्यानंतर उरलेल्या राखेची एकूण 18 पोती भरुन ती दुचाकीवरुन समुद्रात टाकली. तसेच ज्या ठिकाणी मृतदेह जाळला त्या जागेची साफसफाई करुन खालचा कोबा काढून टाकला. त्यामुळे आरोपींनी केलेल्या गुन्ह्याच्या अनुषंगाने ठोस पुरावे शोधण्याचे आव्हान पोलिसांसमोर होते.
वरिष्ठांच्या अनुभव व मार्गदर्शनाखाली गुन्ह्याचा तपास करताना पथकाने घटनास्थळ व भोवतीचा परिसर याचे निरीक्षण व शोध, स्वप्नालीचे नातेवाईक व आरोपींशी संबंधित व्यक्तींकडे चौकशी केली. त्याची सांगड घालत या गुन्ह्याची उकल केली, तसेच न्याय सहाय्यक तज्ज्ञांच्या मदतीने गुन्ह्याशी संबंधित असलेले भौतिक पुरावे शोधून तपासकामी जप्त केल्याचेही गर्ग यांनी पत्रकार परिषदेत सांगितले.
या गुन्ह्याच्या तपासाची कामगिरी जिल्हा अधिक्षक मोहित कुमार गर्ग, अपर पोलिस अधिक्षक जयश्री देसाई, उपविभागीय पोलिस अधिकारी सदाशिव वाघमारे, शहर पोलिस निरीक्षक विनित चौधरी, स्थानिक गुन्हे शाखेचे पोलिस निरीक्षक हेमंतकुमार शहा, पोलिस निरीक्षक मनोज भोसले, प्रविण स्वामी, अमोर गोरे, विजय जाधव, परिवक्षाधीन पोलिस उपनिरीक्षक मीरा महामुने, सहाय्यक पोलिस फौजदार संजय कांबळे, प्रशांत बोरकर, शांताराम झोरे, पोलिस हवालदार संदीप नाईक, जयवंत बगड, दीपक चव्हाण, प्रवीण बर्गे, सचिन कामेरकर, सागर साळवी, वैभव मोरे, उमेश गायकवाड, विजय आंबेकर, बाळू पालकर, प्रसाद जाधव, निलेश कांबळे, सुभाष भागणे, महिला पोलिस हवालदार वैष्णवी यादव, पोलिस नाईक गणेश सावंत, रमीज शेख, सत्यजीत दरेकर, योगेश नार्वेकर, अमोल भोसले, आशिष भालेकर, पंकज पडेलकर, वैभव शिवलकर, विलास जाधव, वैभव नार्वेकर, निलेश कांबळे, अविनाश नवले, दत्ता कांबळे, महिला पोलिस नाईक अर्चना कांबळे, पोलिस शिपाई श्रीकांत दाभाडे, अमित पालवे, शिवानंद चव्हाण, अक्षय कांबळे आणि फॉरेन्सिक युनिटचे राम खेडेकर आदी अधिकारी आणि अंमलदार यांनी केली आहे.