अहमदाबादः गुजरातमधील (Gujrat Mishap) मोरबी पूल (Morbi Bridge) दुर्घटनेत मृत्यूमुखी पडलेल्यांचा आकडा 141 च्याही पुढे गेला आहे. तर 200 पेक्षा जास्त जण या घटनेत जखमी झाले आहेत. तर 200 जण अद्याप बेपत्ता असल्याची भीती व्यक्त केली जात आहे. यामुळे देशाचे पंतप्रधान नरेंद्र मोदी (PM Narendra Modi) यांचा अहमदाबादमधील रोड शो रद्द करण्यात आला आहे. पंतप्रधान मोदी मृतांच्या नातेवाईकांना तसेच घटनेतील जखमींना भेटायला जाण्याची शक्यता आहे.
रविवारी संध्याकाळी मोरबी शहरातील माच्छू नदीवरील झुलता पूळ अचानक कोसळला. संध्याकाळी साडे सहा वाजता ही दुर्घटना घडली. ब्रिटिशांच्या काळातील हा ब्रीज आहे. पाचच दिवसांपूर्वी नूतनीकरण झालेल्या पूलाचे केबल तुटल्याने ही घटना घडली. छटपूजेच्या निमित्ताने या पूलावर 500 ते 600 भाविक उपस्थित होते. अचानक पूल कोसळल्यामुळे अनेक महिला व लहान मुलेदेखील नदीत कोसळले.अजूनही घटनास्थळी बचावकार्य सुरु आहे. दरम्यान, पंतप्रधान नरेंद्र मोदी आज गुजरात दौऱ्यावर आहेत. मृतांच्या नातेवाईकांना पाच लाख रुपयांची मदत पंतप्रधानांच्या वतीने जाहीर करण्यात आली आहे.
मात्र मोरबी पूल दुर्घटनेमुळे पंतप्रधान मोदी यांचा गुजरातमधील रोड शो रद्द करण्यात आला आहे. तसेच गांधी नगर येथे प्रस्तावित पेज समिती कार्यक्रमातही बदल करण्यात आला आहे. मंगळवारी हा कार्यक्रम आयोजित करण्यात आला होता.गुजरात विधानसभा निवडणुकांच्या पार्श्वभूमीवर पंतप्रधान नरेंद्र मोदी सर्वच 182 मतदार संघातील पेज प्रमुखांना संबोधित करणार होते.अधिकृत सूत्रांनी दिलेल्या माहितीनुसार, पंतप्रधान नरेंद्र मोदी आज मोरबी येथे भेट देतील. मोरबी शहरात घटनास्थळी एनडीआरएफ आणि एसडीआरएफ टीम तसेच एअरफोर्स, नेव्हीच्या टीमचे बचावकार्य अखंडपणे सुरु आहे. पंतप्रधान मोदी वेळोवेळी बचावकार्याची माहिती घेत आहेत.
- रेस्क्यू
SDRF आणि NDRFच्या पथकांनी रात्रभर बचावकार्य केले. पथके अजूनही कार्यरत आहेत. कच्छ आणि राजकोट येथून जलतरणपटू आणि अग्निशमन दलाच्या 7 तुकड्या रवाना झाल्या आहेत. नियंत्रण कक्ष आणि हेल्पलाइन क्रमांकही जारी करण्यात आले आहेत. जामनगर येथून हवाई दलाचे 50 गरुड कमांडो, 50 रेस्क्यू बोटी घटनास्थळी हजर आहेत. - मदत
पंतप्रधान नरेंद्र मोदी आणि गृहमंत्री अमित शहा यांनी या अपघातावर शोक व्यक्त केला आहे. मृतांच्या नातेवाइकांना 2 लाख आणि जखमींना 50 हजार रुपयांची मदत जाहीर करण्यात आली आहे. पटेल यांनी मृतांच्या नातेवाइकांना 4 लाख रुपये आणि जखमींना 50 हजार रुपयांची मदत जाहीर केली. - जबाबदार कोण?
पुलाच्या देखभालीची जबाबदारी ओरेवा ग्रुपकडे आहे. या ग्रुपने मार्च 2022 ते मार्च 2037 पर्यंत 15 वर्षांसाठी मोरबी नगरपालिकेसोबत करार केला आहे. हा ग्रुप पुलाची सुरक्षा, स्वच्छता, देखभाल, टोल वसुली?, कर्मचारी व्यवस्थापनाची जबाबदारी सांभाळतो. - कारवाई काय झाली
या पुलाची देखभाल करणाऱ्या कंपनीवर सदोष मनुष्यवधाचा गुन्हा दाखल करण्यात आला आहे. एक समिती स्थापन करण्यात आली असून ही समिती अपघाताची चौकशी करून लवकरात लवकर अहवाल सादर करेल.