कुडाळ – कुडाळ हायस्कूल आणि बॅ. नाथ पै शिक्षण संस्था, सिंधुदुर्ग येथे गौड ब्राम्हण सभा कुडाळदेशकर आद्य गौड ब्राह्मण प्रतिष्ठानतर्फे आयोजित १० वा क्रीडा महोत्सव KPL २०२५ अत्यंत उत्साहात पार पडला. या भव्य सोहळ्याला राज्याचे उद्योग आणि मराठी भाषा मंत्री मा. ना. उदयजी सामंत प्रमुख पाहुणे म्हणून उपस्थित होते.
या कार्यक्रमाद्वारे ज्ञाती बांधवांनी दाखवलेली एकजूट, शिस्तबद्ध नियोजन आणि समर्पण भाव खरोखरच अनुकरणीय असल्याचे कौतुक मा. ना. उदयजी सामंत यांनी व्यक्त केले. मनीष दाभोळकर यांच्या बारकाईच्या नियोजनातून तसेच रणजीत देसाई, महेश ठाकूर, जगदीश वालावलकर, अरुण दाभोळकर, सुनील सौदागर आणि सर्व कार्यकर्त्यांच्या अथक प्रयत्नांतून हा कार्यक्रम यशस्वी झाला, असे त्यांनी नमूद केले.
आपल्या भाषणात त्यांनी सांगितले की –
“आपली ज्ञाती फक्त संख्येने नव्हे तर कार्याने मोठी व्हावी. समाजातील सर्व घटकांना सोबत घेऊन पुढे जाण्याची क्षमता प्रत्येकाने विकसित करावी.”
तसेच, पुढील काळात तरुण पिढी स्वावलंबी आणि सक्षम व्हावी यासाठी अशा उपक्रमांचे दरवर्षी आयोजन व्हावे, अशी कल्पनाही त्यांनी मांडली.कार्यक्रमातील एक विशेष आकर्षण म्हणजे बांबू शिल्पातून केलेला सत्कार. महाराष्ट्रात ‘बांबू धोरण’ लागू करणारा पहिला निर्णय आपल्याच ज्ञातीतील उद्योगमंत्र्यांनी घेतलेला असल्याने हा सन्मान अभिमानाचा क्षण ठरला.एकता, संस्कृती आणि समाजोन्नतीचा संदेश देणाऱ्या या KPL २०२५ उपक्रमामुळे ज्ञातीबंधूंच्या नात्यांमध्ये आणखी घट्ट बंध निर्माण झाले.
आयोजक, कार्यकर्ते आणि सर्व उपस्थित बांधवांनी दाखवलेल्या उत्साहाचे आणि समर्पणाचे मा. ना. उदयजी सामंत यांनी मनःपूर्वक अभिनंदन केले. हा क्रीडा महोत्सव केवळ स्पर्धांचा नव्हे तर एकतेचा उत्सव ठरला — जो समाजाच्या प्रगतीचा आणि अभिमानाचा दीप पुढे प्रज्वलित करतो.