शरद पवारांच्या हस्ते गरवारे क्लबमधील अत्याधुनिक क्रीडा सुविधांचा भव्य शुभारंभ
मुंबई : शहरातील क्रीडाप्रेमींसाठी आनंदाची बातमी आहे. मुंबईतील सुप्रसिद्ध गरवारे क्लब येथे आज टेनिस कोर्ट, पॅडल कोर्ट आणि पिकलबॉल कोर्ट या अत्याधुनिक क्रीडासुविधांचे भव्य उद्घाटन राष्ट्रवादी काँग्रेसचे ज्येष्ठ नेते शरद पवार यांच्या शुभहस्ते करण्यात आले.
सुविधांचा भव्य शुभारंभ
गरवारे क्लबमध्ये टेनिस कोर्ट, पॅडल कोर्ट आणि पिकलबॉल कोर्ट या अत्याधुनिक व आंतरराष्ट्रीय दर्जाच्या क्रीडांगणांचे आज
विधिवत उद्घाटन करण्यात आले. या उद्घाटन सोहळ्याला गरवारे कमिटीचे सर्व सदस्य उपस्थित होते. नवीन कोर्ट्सची उभारणी ही मुंबईसह उपनगरातील क्रीडाप्रेमी व खेळाडूंसाठी मोठी संधी ठरणार आहे. क्रीडाक्षेत्रात वाढत्या स्पर्धात्मक वातावरणात योग्य सुविधा आणि उत्कृष्ट सरावाचे मैदान मिळणे हे खेळाडूंच्या प्रगतीसाठी अत्यंत महत्त्वाचे ठरते.
गरवारे क्लबच्या या उपक्रमामुळे शहरातील टेनिस, पॅडल आणि पिकलबॉल खेळाडूंना दर्जेदार वातावरणात सराव करण्याची संधी उपलब्ध होणार आहे. उद्घाटनावेळी बोलताना आयोजकांनी सांगितले की, “मुंबईतील प्रतिभावंत खेळाडूंना अधिक चांगल्या पायाभूत सुविधा देणे हे आमचे उद्दिष्ट आहे. या नवीन कोर्ट्समुळे नवोदित ते व्यावसायिक अशा सर्व श्रेणीतील खेळाडूंना त्यांच्या खेळाची गुणवत्ता उंचावण्यास मदत मिळेल.”
या सुविधा उपलब्ध झाल्यामुळे राष्ट्रीय आणि राज्यस्तरीय स्पर्धाही भविष्यात येथे आयोजित करण्याचा प्रयत्न केला जाणार असल्याचेही क्लबच्या पदाधिकाऱ्यांनी स्पष्ट केले. गरवारे क्लबने यापूर्वीही क्रीडा विकासासाठी महत्त्वपूर्ण उपक्रम राबवले
असून आता या आधुनिक कोर्ट्समुळे क्रीडा क्षेत्रात आणखी एक सकारात्मक पाऊल टाकले आहे. मुंबईतील क्रीडा संस्कृती समृद्ध करण्यासाठी तसेच तरुणांमध्ये खेळाची आवड निर्माण करण्यासाठी या सुविधांचा निश्चितच उपयोग होईल, असा विश्वास व्यक्त करण्यात आला आहे.