पुणे विमानतळाला १५ नवीन स्लॉट्स; विमान हालचाली २३५ पर्यंत वाढणार, हवाई जोडणीत मोठी झेप
पुणे (प्रतिनिधी): पुण्याच्या हवाई वाहतुकीला मोठी चालना मिळाली असून पुणे विमानतळ येथे १५ अतिरिक्त फ्लाइट स्लॉट्स मंजूर करण्यात आले आहेत. यामुळे एकूण विमान हालचालींची संख्या २२० वरून २३५ पर्यंत वाढणार आहे. ही नवी व्यवस्था मे २०२६ पासून लागू होणार आहे.
या निर्णयामुळे पुण्याच्या हवाई जोडणीत लक्षणीय सुधारणा होणार असून नवीन गंतव्यस्थानांचे मार्ग खुले होणार आहेत. विशेषतः पुणे–मंगळूर, पुणे–सोलापूर आणि पुणे–बागडोगरा (पश्चिम बंगाल) या नव्या थेट उड्डाण मार्गांचे नियोजन करण्यात आले आहे.
या अतिरिक्त स्लॉट्समुळे प्रवाशांना अधिक सोयीस्कर वेळेत उड्डाणे उपलब्ध होतील. तसेच प्रादेशिक जोडणी मजबूत होऊन व्यवसाय, उद्योग आणि पर्यटन क्षेत्राला चालना मिळण्याची अपेक्षा आहे. यामुळे मुंबई विमानतळावरील अवलंबित्वही काही प्रमाणात कमी होणार आहे.
वाढत्या हवाई प्रवासाच्या मागणीच्या पार्श्वभूमीवर हा निर्णय महत्त्वाचा मानला जात आहे. सुधारित सुविधा आणि वाढत्या पायाभूत विकासाच्या जोरावर पुणे शहर एक प्रमुख विमानन केंद्र म्हणून उदयास येत असल्याचे तज्ज्ञांचे मत आहे.