सॉलिसिटर जनरल तुषार मेहता यांच्या दोन पुस्तकांचे प्रकाशन
भारताचे सॉलिसिटर जनरल तुषार मेहता यांच्या ‘The Bench, The Bar and The Bizarre’ आणि ‘The Lawful and The Awful’ या दोन पुस्तकांचे प्रकाशन केंद्रीय गृहमंत्री अमित शाह आणि भारताचे सरन्यायाधीश सूर्यकांत यांच्या उपस्थितीत संपन्न झाले.
प्रकाशकांच्या माहितीनुसार, या पुस्तकांमध्ये कायद्याच्या क्षेत्रातील विविध पैलूंवर मार्मिक निरीक्षणे, रंजक किस्से आणि न्यायव्यवस्थेतील मानवी अनुभवांचे वेधक चित्रण करण्यात आले आहे.
यावेळी सरन्यायाधीश सूर्यकांत यांनी पुस्तकांतील न्यायालयीन विनोद, सूक्ष्म निरीक्षणे आणि तपशीलवार मांडणीचे विशेष कौतुक केले. “कायदा हा केवळ न्यायनिवाड्यांनी घडत नाही, तर त्यामागील मानवी नाट्य, बुद्धिमत्ता आणि चातुर्य यांचाही त्यात मोठा वाटा असतो,” असे मत त्यांनी व्यक्त केले.
या प्रकाशन सोहळ्यास भारताचे ॲटर्नी जनरल आर. व्यंकटरमणी यांच्यासह न्याय आणि कायदा क्षेत्रातील अनेक मान्यवर उपस्थित होते.