युनायटेड नेशन्सकडून मेजर अभिलाषा बराक यांना जागतिक सन्मान

भारतमातेच्या वीरकन्या मेजर अभिलाषा बराक (Major Abhilasha Barak) यांना युनायटेड नेशन्स (United Nations) तर्फे प्रदान करण्यात येणारा प्रतिष्ठेचा मिलिटरी जेंडर अ‍ॅडव्होकेट ऑफ द इयर’ (‘Military Gender Advocate of the Year’) पुरस्कार जाहीर झाला आहे.

सध्या त्या United Nations Interim Force in Lebanon अंतर्गत लेबेनॉनमध्ये भारतीय ‘फिमेल एंगेजमेंट टीम’ (Female Engagement Team) च्या कमांडर म्हणून कार्यरत आहेत. अत्यंत आव्हानात्मक आणि प्रतिकूल परिस्थितीत त्यांनी स्थानिक महिला व मुलींच्या सक्षमीकरणासाठी, आरोग्यविषयक जनजागृतीसाठी आणि शिक्षणाच्या प्रसारासाठी उल्लेखनीय कार्य केले आहे.

त्यांच्या नेतृत्वाखाली राबविण्यात आलेल्या विविध उपक्रमांमुळे स्थानिक समुदायांमध्ये सकारात्मक बदल घडून आले असून महिलांच्या सहभागाला आणि आत्मविश्वासाला नवी दिशा मिळाली आहे. त्यांच्या या समर्पित सेवेला आणि शांतता प्रस्थापित करण्याच्या प्रयत्नांना जागतिक स्तरावर गौरवण्यात आले आहे.

संकटाच्या काळात शांततेचे प्रतीक बनून भारताची ताकद, संवेदनशीलता आणि नेतृत्वगुण जगासमोर मांडणाऱ्या मेजर अभिलाषा बराक यांचे सर्व स्तरांतून अभिनंदन होत आहे. त्यांच्या या यशामुळे संपूर्ण देशाचा गौरव वाढला असून भारतीय महिलांसाठी हा प्रेरणादायी क्षण ठरला आहे.