मुंबईच्या पाणीसाठ्यात चिंताजनक घट; सात तलावांमध्ये केवळ १२.८५ टक्के साठा
मुंबई-
मुंबई शहराला पाणीपुरवठा करणाऱ्या सात प्रमुख तलावांमधील पाणीसाठा चिंताजनक पातळीवर पोहोचला असून सध्या केवळ १,८६,०३२ दशलक्ष लिटर (ML) पाणी उपलब्ध आहे. हा साठा तलावांच्या एकूण क्षमतेच्या फक्त १२.८५ टक्के इतकाच आहे.
या पार्श्वभूमीवर मुंबई महानगरपालिकेने (BMC) १५ मेपासून पाणीपुरवठ्यात १० टक्के कपात लागू केली आहे. पाण्याचा वाढता वापर आणि कमी झालेला साठा लक्षात घेता नागरिकांना पाणी जपून वापरण्याचे आवाहन करण्यात आले आहे.
मुंबईला दररोज सुमारे ३.४ अब्ज लिटर पाणी पुरवणाऱ्या भातसा, मिडल वैतरणा, अप्पर वैतरणा, मोडक सागर, तानसा, विहार आणि तुळशी या सात तलावांवर संपूर्ण शहराची तहान अवलंबून आहे.
दरम्यान, या तलावांच्या पाणलोट क्षेत्रांमध्ये अद्याप समाधानकारक पाऊस झालेला नाही. आतापर्यंत तानसा आणि मोडक सागर परिसरात काही प्रमाणात पाऊस पडला असला तरी उर्वरित पाच तलावांची पाणलोट क्षेत्रे अद्याप कोरडीच आहेत. त्यामुळे आगामी काही दिवसांतील पावसावर मुंबईच्या जलसुरक्षेचे मोठे गणित अवलंबून राहणार आहे.
पाणीसाठ्यातील घट आणि मान्सूनच्या संथ प्रगतीमुळे मुंबईकरांसमोर पाणी व्यवस्थापनाचे आव्हान निर्माण झाले असून, पाण्याचा काटकसरीने वापर करणे ही काळाची गरज बनली आहे.
