समृद्धी महामार्ग होणार अधिक हिरवागार; हरितीकरणासाठी सामाजिक वनीकरण विभाग आणि एमएसआरडीसीमध्ये करार

समृद्धी महामार्ग होणार अधिक हिरवागार; हरितीकरणासाठी सामाजिक वनीकरण विभाग आणि एमएसआरडीसीमध्ये करार

मुंबई : राज्यातील महत्त्वाकांक्षी हिंदुहृदयसम्राट बाळासाहेब ठाकरे महाराष्ट्र समृद्धी महामार्ग अधिक हरित आणि पर्यावरणपूरक करण्याच्या दिशेने महत्त्वाचे पाऊल उचलण्यात आले आहे. समृद्धी महामार्गाच्या दोन्ही बाजूंनी व्यापक वृक्षारोपण आणि हरितीकरण करण्यासाठी सामाजिक वनीकरण विभाग आणि महाराष्ट्र राज्य रस्ते विकास महामंडळ (एमएसआरडीसी) यांच्यात सामंजस्य करार (MoU) करण्यात आला.

राज्याचे वनमंत्री गणेश नाईक यांच्या उपस्थितीत हा करार पार पडला. या उपक्रमामुळे महामार्ग परिसरात मोठ्या प्रमाणावर वृक्षलागवड होणार असून पर्यावरण संवर्धन, जैवविविधता संरक्षण आणि शाश्वत विकासाला चालना मिळणार आहे.

समृद्धी महामार्ग केवळ जलद वाहतुकीचा मार्ग न राहता पर्यावरणपूरक आणि हरित विकासाचे प्रतीक बनावे, हा या उपक्रमामागील प्रमुख उद्देश आहे. वृक्षारोपणामुळे कार्बन उत्सर्जन कमी होण्यास मदत होणार असून प्रवाशांनाही अधिक निसर्गरम्य वातावरणाचा अनुभव मिळणार आहे.

राज्य शासनाच्या या उपक्रमामुळे हरित महाराष्ट्राच्या संकल्पनेला बळ मिळणार असून भविष्यात इतर महामार्गांवरही अशाच प्रकारचे हरितीकरण प्रकल्प राबविण्याचा मार्ग मोकळा होणार आहे.