गोव्यातील आलिशान व्हिलामधून सायबर फसवणुकीचे रॅकेट; १२ तरुणांना अटक
गोव्यातील कळंगुट परिसरातील कँडोलिम येथील एका व्हिलामधून चालणारे कथित सायबर फसवणूक आणि आर्थिक व्यवहारांचे रॅकेट मुंबई पोलिसांच्या गुन्हे शाखेने उघडकीस आणले. या कारवाईत १२ तरुणांना अटक करण्यात आली असून, पोलिसांनी मोठ्या प्रमाणात इलेक्ट्रॉनिक उपकरणे आणि बँकिंगशी संबंधित साहित्य जप्त केले आहे. ही कारवाई ४ ऑगस्ट २०२६ रोजी करण्यात आली होती.
८५ मोबाईल, १५ लॅपटॉपसह बँकिंग साहित्य जप्त
पोलिसांनी व्हिलाची झडती घेतली असता १५ लॅपटॉप, ८५ मोबाईल फोन, १२८ एटीएम कार्ड, ७६ सिमकार्ड, २२ चेकबुक आणि ७७ बँक पासबुक जप्त करण्यात आली. याशिवाय राऊटर आणि इतर उपकरणेही पोलिसांच्या हाती लागली.
प्राथमिक तपासानुसार, आरोपी कथितरीत्या सायबर फसवणुकीतून मिळालेली रक्कम अनेक बँक खात्यांमध्ये वेगाने हस्तांतरित करण्याचे काम करत होते. या प्रक्रियेत इतर व्यक्तींच्या नावावरील बँक खात्यांचा आणि त्यांच्याशी जोडलेल्या सिमकार्डचा वापर केल्याचा पोलिसांना संशय आहे.
५०० कोटींच्या व्यवहारांचा संशय
पोलिसांच्या तपासानुसार, या व्हिलामधून चालणाऱ्या कथित नेटवर्कशी देशभरातील १८६ सायबर गुन्ह्यांचा संबंध आढळला आहे. सुमारे ७,५०० बँक खात्यांमधील १२० कोटी रुपये गोठवण्यात आल्याचेही वृत्त आहे. या टोळीने सुमारे ५०० कोटी रुपयांचे व्यवहार केल्याचा पोलिसांचा प्राथमिक अंदाज आहे.
या प्रकरणाचे धागेदोरे मुंबईतील एका संशयास्पद कार्यालयापर्यंत पोहोचले. तेथून बँक खाती उघडणे आणि संबंधित सिमकार्ड गोव्यात पाठविणे, असा कथित प्रकार तपासात समोर आला. या रॅकेटचे काही सूत्रधार दुबईतून काम करत असल्याचा पोलिसांना संशय असून, पुढील तपास सुरू आहे