खैर तस्करीवर वनविभागाची कारवाई; मात्र कारवाईच्या नोंदीवर राष्ट्रवादी काँग्रेसचा (शरदचंद्र पवार) पक्षाच्या आक्षेप, अधिकाऱ्यांच्या चौकशीची मागणी
खैर तस्करीवर वनविभागाची कारवाई; मात्र कारवाईच्या नोंदीवर राष्ट्रवादी काँग्रेसचा (शरदचंद्र पवार) पक्षाच्या आक्षेप, अधिकाऱ्यांच्या चौकशीची मागणी
रायगड:
जिल्ह्यात वनविभागाने खैर लाकूड तस्करी प्रकरणी रात्रीच्या वेळी एक मोठी कारवाई केली आहे. या कारवाईत एका वाहनासह मोठ्या प्रमाणावर खैराचे लाकूड जप्त करण्यात आले असून एका संशयित आरोपीलाही अधिकाऱ्यांनी ताब्यात घेतले आहे. जप्त केलेल्या लाकडाचा मोठा ढिगारा छायाचित्रांमध्ये स्पष्टपणे दिसत आहे. मात्र, वरकरणी मोठी दिसणारी ही कारवाई आता वादाच्या भोवऱ्यात सापडली असून, वनविभागाच्या कार्यपद्धतीवरच गंभीर प्रश्नचिन्ह निर्माण झाले आहे.
राष्ट्रवादी काँग्रेस पार्टीचे (शरदचंद्र पवार) रायगड जिल्हा संघटक तथा श्रीवर्धन विधानसभा अध्यक्ष अझहर धनसे यांनी या कारवाईबाबत वनविभागावर गंभीर आरोप केले आहेत.
नेमका आरोप काय आहे?
अझहर धनसे यांनी त्यांच्या अधिकृत सोशल मीडिया पोस्टद्वारे खालील बाबी निदर्शनास आणून दिल्या आहेत:
किमतीत तफावत: जप्त केलेल्या खैराच्या लाकडाची किंमत लाखो रुपये असताना, वनविभागाने अत्यंत संशयास्पद पद्धतीने त्याची नोंद केली आहे.
मोजमापाचा खेळ: वनविभागाच्या अधिकृत प्रेस नोटमध्ये तब्बल २६२ नग लाकूड जप्त केल्याचे नमूद करण्यात आले आहे. मात्र, त्याचे मोजमाप केवळ २ घनमीटर दाखवून या संपूर्ण लाकडाची किंमत अवघी १२ हजार रुपये दाखवण्यात आली आहे.
तस्करांना पाठीशी घालण्याचा प्रयत्न: खैराचे लाकूड हे बाजारात ‘किलोच्या’ दराने विकले जाते. असे असताना अधिकाऱ्यांनी जाणीवपूर्वक ‘घनमीटर’चा खेळ करून बड्या तस्करांना वाचवण्याचा उघड प्रयत्न सुरू केला आहे, असा थेट आरोप धनसे यांनी केला आहे.
सखोल विभागीय चौकशीची मागणी
या प्रकाराबद्दल राष्ट्रवादी काँग्रेस पार्टी (शरदचंद्र पवार) तीव्र निषेध व्यक्त करत आहे. लाखोंचे लाकूड केवळ १२ हजारांचे दाखवणाऱ्या या प्रकरणातील संबंधित अधिकाऱ्यांची तात्काळ सखोल विभागीय चौकशी करावी, अशी ठाम मागणी अझहर धनसे यांनी पक्षाच्या वतीने केली आहे.
एकीकडे वनविभागाचे पथक रात्रीची गस्त घालून तस्करांना पकडत असल्याचे छायाचित्रांवरून दिसत असले तरी, कागदोपत्री झालेल्या या नोंदींमुळे कारवाईच्या पारदर्शकतेवरच संशय व्यक्त केला जात आहे. आता या प्रकरणी वरिष्ठ अधिकारी काय भूमिका घेतात, याकडे लक्ष लागून आहे.
