दिवाळी सणाच्या पार्श्वभूमीवर नागरिकांना शुभेच्छांचे मेसेज पाठवून सायबर फसवणूक करण्याचे प्रकार घडण्याची शक्यता लक्षात घेता महाराष्ट्र पोलिसांच्या सायबर विभागाने नागरिकांना सतर्क राहण्याचे आवाहन केले आहे. दिवाळीच्या शुभेच्छा, आकर्षक ग्रीटिंग्ज आणि सणासुदीच्या ऑफर्सच्या नावाखाली पाठवण्यात येणाऱ्या संशयास्पद लिंकपासून सावध राहण्याच्या सूचना देण्यात आल्या आहेत.
सायबर भामटे दिवाळीच्या शुभेच्छा देणारे मेसेज, आकर्षक दिवाळी ग्रीटिंग्ज किंवा मोफत भेटवस्तूंच्या आमिषाने अनोळखी लिंक पाठवू शकतात. अशा लिंकवर क्लिक केल्यास मोबाईलमध्ये हानिकारक अॅप्लिकेशन डाउनलोड होण्याचा किंवा वैयक्तिक माहिती चोरीला जाण्याचा धोका असतो. तसेच बँक खाते, पासवर्ड, ओटीपी आणि आर्थिक व्यवहारांशी संबंधित माहिती मिळवून आर्थिक फसवणूक केली जाऊ शकते.
नागरिकांनी अनोळखी क्रमांकावरून आलेल्या लिंकवर क्लिक करू नये. संशयास्पद APK फाइल डाउनलोड करू नयेत. कोणत्याही परिस्थितीत ओटीपी, बँक खात्याची माहिती किंवा वैयक्तिक तपशील अनोळखी व्यक्तींना देऊ नयेत. दिवाळीच्या शुभेच्छांचे मेसेज पाठवताना किंवा फॉरवर्ड करताना त्यांची सत्यता तपासावी.
सणाचा आनंद साजरा करताना सायबर सुरक्षेकडे दुर्लक्ष करू नका. थोडीशी सतर्कता आपली आर्थिक फसवणूक टाळू शकते. त्यामुळे नागरिकांनी सावध राहावे आणि सायबर गुन्हेगारांच्या आमिषांना बळी पडू नये, असे आवाहन महाराष्ट्र पोलिसांच्या सायबर विभागाने केले आहे.
सायबर फसवणूक झाल्यास हेल्पलाइन क्रमांक १९३० वर तातडीने संपर्क साधावा किंवा cybercrime.gov.in या संकेतस्थळावर तक्रार नोंदवावी.
SEO Tags: दिवाळी मेसेज घोटाळा, सायबर फसवणूक, महाराष्ट्र पोलीस सायबर विभाग, दिवाळी ऑनलाइन फ्रॉड, बनावट दिवाळी ग्रीटिंग्ज, संशयास्पद लिंक, सायबर सुरक्षा जनजागृती, Cyber Crime Maharashtra, Sindhudurg Samachar
