शहापूरमधील दुष्काळसदृश परिस्थितीची गणेश नाईक यांच्याकडून पाहणी; पंचनाम्यांचे निर्देश 

शहापूरमधील दुष्काळसदृश परिस्थितीची वनमंत्री गणेश नाईक यांच्याकडून पाहणी

नुकसानीचे तातडीने पंचनामे करण्याचे निर्देश

शहापूर :

दिवाळीचा सण सर्वत्र उत्साहात साजरा होत असताना शहापूर तालुक्यातील ग्रामीण भागात मात्र दुष्काळसदृश परिस्थिती निर्माण झाली आहे. या परिस्थितीमुळे नागरिक आणि शेतकऱ्यांना मोठ्या संकटाचा सामना करावा लागत आहे. या गंभीर परिस्थितीची दखल घेत वनमंत्री तथा पालघर जिल्ह्याचे पालकमंत्री गणेश नाईक यांनी ढाढरे ग्रामपंचायत हद्दीतील खालपाटवाडी येथे प्रत्यक्ष भेट देऊन परिस्थितीची पाहणी केली.

यावेळी त्यांनी दुष्काळसदृश परिस्थितीमुळे नागरिकांना भेडसावणाऱ्या अडचणी, शेतीचे झालेले नुकसान आणि स्थानिक परिस्थितीची माहिती घेतली. पाहणीदरम्यान कृषी आणि महसूल विभागाच्या अधिकाऱ्यांना संबंधित भागातील नुकसानीचे तातडीने पंचनामे करण्याच्या सूचना देण्यात आल्या. परिस्थितीचे वस्तुनिष्ठ मूल्यांकन करून बाधित नागरिकांना आवश्यक ती मदत मिळावी, यासाठी प्रशासनाने तत्परतेने कार्यवाही करावी, असे स्पष्ट निर्देशही त्यांनी दिले.

या भागातील परिस्थितीचा मुद्दा आगामी मंत्रिमंडळ बैठकीत मांडून शासन स्तरावर आवश्यक उपाययोजना आणि मदतीसाठी पाठपुरावा करण्यात येईल, असे गणेश नाईक यांनी सांगितले. संकटाच्या काळात कोणताही गरीब, शेतकरी किंवा गरजू नागरिक मदतीपासून वंचित राहू नये, ही शासनाची भूमिका असल्याचे त्यांनी स्पष्ट केले.

सणासुदीच्या काळातही संकटाचा सामना करणाऱ्या कुटुंबांना आधार मिळावा आणि त्यांच्या अडचणी दूर व्हाव्यात, यासाठी शासन व प्रशासनाच्या माध्यमातून आवश्यक ती पावले उचलण्यात येतील, अशी ग्वाही त्यांनी दिली.