🔥दैनिक सिंधुदुर्ग समाचार l रत्नागिरी –
कंपनीकडून कर्ज मिळवून देतो, असे सांगून सिंधुदुर्गातील फायनान्स कंपनीच्या विभागप्रमुखाने गोळप-कातळवाडी (ता. रत्नागिरी) येथील महिलेची २ लाख ३० हजार ४९९ रुपयांची फसवणूक केल्याचा प्रकार उघड झाला आहे. https://sindhudurgsamachar.in/maharashtra-बदलापूर-अत्याचार-प्रकर/
पोलिसांनी दिलेल्या माहितीनुसार, याप्रकरणी ओमकार पालव (रा. कुडाळ, सिंधुदुर्ग) यांच्यावर पूर्णगड पोलिस स्थानकात गुन्हा दाखल करण्यात आला आहे. फसवणुकीचा हा प्रकार ४ ते ११ नोव्हेंबर २०२४ या कालावधीत घडल्याचे फिर्यादीत म्हटले आहे. महिलेने दिलेल्या फिर्यादीनुसार त्या आणि साक्षीदार यांनी २४ ऑक्टोबर २०२४ रोजी एका वृत्तपत्रात प्रसिद्ध झालेल्या बातमीवरून स्मॉल फायनान्शिअल सर्व्हिसेस या कंपनीचे कर्ज विभागप्रमुख ओमकार पालव यांच्याशी संपर्क केला. त्यांनी कर्जाची आवश्यकता असल्याचे त्यांना सांगितले. त्यावर ओमकार पालव यांनी फिर्यादी महिलेला १० ते १२ महिलांचा गट तयार करा, तुम्हाला कर्ज पुरवण्याची व्यवस्था करतो, असे सांगत विश्वास संपादन केला. त्यानंतर कर्जाच्या प्रक्रियेसाठी सभासद नोंदणी, भाग-भांडवल फी, नोटरी स्टँप व वकील कोर्ट फी स्टँप यासाठी पालव यांनी फिर्यादी महिलेकडून रोख व गुगल पेद्वारे एकूण २ लाख ३० हजार ४९९ रुपये घेऊन कर्ज मिळवून देतो, असे सांगून कर्ज न देता फसवणूक केली. या प्रकरणी भारतीय न्याय संहिता अधिनियम २०२३ चे कलम ३१८ (४),३१६ (२) प्रमाणे सोमवारी (१६ डिसेंबर) गुन्हा दाखल करण्यात आला आहे. अधिक तपास सुरु आहे.