कणकवली:-दि. २०:- एके काळी मुलांनी झोपावे म्हणून ‘पोलिसां’ चा धाक दाखविला जायचा. तद्नंतर झोप नाही तर ‘शोले’ चित्रपटातील ‘गब्बर’ अर्थात अमजद खानचा धाक आया मुलांना दाखवायच्या. पण महाराष्ट्रातील पोलिस खाते सद्या एवढे सकारात्मक झाले आहे की, भर मध्यरात्री पुरुष पोलिसांसमवेत महिला पोलिसही रात्री अपरात्री गुन्हेगारांच्या शोधात वणवण फिरत असल्याचा अनुभव नुकताच आपल्याला आला, पोलिसांबद्दल एक आदर्श भावना निर्माण झाली आणि महिला पोलिसांबद्दल अभिमानही वाटला अशी माहिती ज्येष्ठ पत्रकार गणपत तथा भाई चव्हाण यांनी एका प्रसिध्दी पत्रकाद्वारे दिली आहे. https://sindhudurgsamachar.in/kokan-मोर्लेत-हत्तींकडून-धुमश/
गेल्या काही वर्षांत सिंधुदुर्ग जिल्ह्यात गुन्हेगारीचे प्रमाण वाढले आहे. सामान्य जनताही हैराण झाली आहे. पोलिसांच्या नावाने बोटे मोडताना दिसत आहे. या पार्श्वभूमीवर जिल्हातील अपुरी पोलिस यंत्रणा असूनही दक्ष झाली आहे. पोलिस रात्री अपरात्री ग्रस्त घालत आहेत असे चव्हाण म्हणाले.
चारच दिवसांपूर्वी पहाटे आमच्या घरी आम्ही साखर झोपेत असताना दारावरची बेल- घंटा वाजली. पहाटेचे साडेतीन वाजण्याच्या दरम्यानची ही घटना आहे. आम्ही कुटुंबीय साखर झोपेत होतो. दारावरची बेल वाजल्यामुळे मुलगा अभय आणि सून संचिता जागी झाली. दार उघडल्यावर घराबाहेर पोलिस उभे होते. त्यांच्याकडे चौकशी केली असता एका गुन्हेगाराचे भ्रमरध्वनी लोकेशन या परिसरात आम्हाला आढळले आहे म्हणून आम्ही तपास करीत आहोत असे त्यांनी आम्हाला सांगितले. आमच्या अगदी नवीन भाडोत्रीचीही चौकशी केली. पण त्यांना हव्या त्या गुन्हेगाराचा माग लागला नाही. दरम्यान आम्ही उभयताही जागे झालो आणि आम्हाला आश्चर्याचा धक्का बसला. एक महिला पोलिस आमच्या सर्वांसह भाडोत्र्यांची चौकशी करु लागली. आम्हाला त्या महिला पोलिसाचे कौतुक वाटले. रात्री-अपरात्री महिला पोलिसही सतर्क राहून ग्रस्त घालत असल्याचे पाहून त्यांचा अभिमान वाटला.