सर्पमित्र संदेश जाधव, विजय खावडकर यांची कामगिरी; लांजा माऊली नगर येथे बांधकामात अडकली होती घोरपड
लांजा (प्रतिनिधी)– शहरातील माऊली नगर येथे बांधकामामध्ये अडकून पडलेल्या घोरपडीला सर्पमित्रांनी पकडून तिला नैसर्गिक अधिवासात सोडून जीवदान दिले. बुधवारी २३ नोव्हेंबर रोजी दुपारी ही घटना घडली.
लांजा माऊली नगर येथे घराचे बांधकाम सुरू आहे. बांधकामामध्ये भली मोठी घोरपड अडकून पडल्याची बाब येथील ग्रामस्थांच्या, कामगारांच्या लक्षात आल्यानंतर सर्पमित्रांना याबाबतची माहिती देण्यात आली. त्यानंतर सर्पमित्र संदीप जाधव तसेच विजय खावडकर हे माऊली नगर या ठिकाणी गेले. यानंतर सुमारे तासा ते दीड तासाच्या प्रयत्नांनी बांधकामात अडकून पडलेल्या या घोरपडीला सर्पमित्रांनी पकडले. यानंतर या घोरपडीला पकडून तिला जंगलात सोडून देण्यात आले. याबद्दल सर्पमित्र संदेश जाधव आणि विजय खावडकर यांचे अभिनंदन केले जात आहे.