इतिहासात प्रथमच! भारतीय सैन्य अकादमीतून ९ महिला कॅडेट्स उत्तीर्ण

इतिहासात प्रथमच! भारतीय सैन्य अकादमीतून ९ महिला कॅडेट्स उत्तीर्ण

डेहराडून : भारतीय संरक्षण दलांच्या इतिहासात नवा अध्याय लिहिला गेला असून, इतिहासात प्रथमच भारतीय सैन्य अकादमी (IMA) मधून ९ महिला कॅडेट्स यशस्वीरित्या उत्तीर्ण झाल्या आहेत. राष्ट्रपती द्रौपदी मुर्मू यांच्या उपस्थितीत डेहराडून येथील भारतीय सैन्य अकादमीमध्ये १५८ व्या नियमित अभ्यासक्रमाच्या आणि १४१ व्या तांत्रिक पदवी अभ्यासक्रमाच्या दीक्षांत संचलनाचा भव्य सोहळा पार पडला.

राष्ट्रीय संरक्षण अकादमी (NDA) मधून प्रशिक्षण पूर्ण केल्यानंतर या महिला कॅडेट्स आयएमएमध्ये दाखल झाल्या होत्या. त्यांच्या कमिशनिंगनंतर त्या भारतीय सैन्यात थेट कायमस्वरूपी कमिशन मिळवणाऱ्या महिला अधिकाऱ्यांची पहिली तुकडी ठरणार आहेत.

यावेळी राष्ट्रपती द्रौपदी मुर्मू यांनी नव्या अधिकारी कॅडेट्सना संबोधित करताना सांगितले की, लष्करी अधिकारी म्हणून त्यांच्यावर सैनिकांचे नेतृत्व करणे, त्यांना मार्गदर्शन करणे आणि त्यांच्या कल्याणाची जबाबदारी असेल. दीक्षांत संचलनात ९ महिला कॅडेट्सची उपस्थिती हा भारतीय सैन्य अकादमीच्या इतिहासातील अत्यंत महत्त्वाचा आणि अभिमानास्पद क्षण असल्याचे त्यांनी नमूद केले.

आतापर्यंत महिला अधिकारी प्रथम शॉर्ट सर्व्हिस कमिशनद्वारे सैन्यात दाखल होत असत आणि त्यानंतर निश्चित सेवा कालावधीनंतर कायमस्वरूपी कमिशनसाठी पात्र ठरत असत. मात्र, या महिला कॅडेट्सना थेट कायमस्वरूपी कमिशन मिळणार असल्याने भारतीय सैन्यातील महिला सक्षमीकरणाच्या दिशेने हा एक ऐतिहासिक टप्पा मानला जात आहे.

महिला-नेतृत्वाखालील विकासाच्या भारताच्या संकल्पनेला बळ देणारी ही घटना असून, देशातील लाखो तरुणींना सैन्य क्षेत्रात करिअर घडविण्यासाठी नवी प्रेरणा मिळणार आहे.