उरणमधील दुहेरी मृत्यू प्रकरणाची सखोल चौकशी करण्याची मागणी

उरणमधील दुहेरी मृत्यू प्रकरणाची सखोल चौकशी करण्याची मागणी

दि. ०१ जून २०२६ रोजी रात्री उरण शहरात दोन दुचाकीस्वार तरुणांचा अपघात होऊन जागीच मृत्यू झाला होता. प्रारंभी हा अपघात दोन बाईकची समोरासमोर धडक झाल्याने झाल्याचे सांगण्यात आले होते.

मात्र, घटनेनंतर आठ दिवस उलटूनही शहरातील काही नागरिकांमध्ये या अपघाताबाबत विविध शंका व्यक्त केल्या जात आहेत. काहींच्या मते संबंधित तरुण एकाच दिशेने प्रवास करत होते आणि मागून आलेल्या एखाद्या मोठ्या वाहनाने त्यांना धडक दिली असावी. त्यामुळे हा केवळ अपघात नसून घातपाताचा प्रकार असू शकतो, अशी चर्चा शहरात सुरू आहे.

तथापि, या दाव्यांना अद्याप कोणतीही अधिकृत पुष्टी मिळालेली नाही. त्यामुळे या प्रकरणाबाबत विविध अफवा पसरत असून नागरिकांमध्ये संभ्रमाचे वातावरण निर्माण झाले आहे.

या पार्श्वभूमीवर भावना घाणेकर (Bhavana Ghaanekar) तसेच महाविकास आघाडीच्या नगरसेवकांनी उरण पोलीस ठाण्यात निवेदन देऊन संबंधित अपघाताची निष्पक्ष आणि सखोल चौकशी करण्याची मागणी केली आहे.

घटनेमागील सत्य परिस्थिती समोर यावी आणि नागरिकांच्या मनातील शंका दूर व्हाव्यात यासाठी पोलीस प्रशासनाने सर्व तांत्रिक पुरावे, सीसीटीव्ही फुटेज आणि साक्षीदारांच्या आधारे तपास करावा, अशी मागणी करण्यात आली आहे.