गणेशोत्सवाच्या पार्श्वभूमीवर कणकवली रेल्वे स्थानकावर स्थानिक कारागिरांच्या कलाकौशल्याला आणि कल्पकतेला व्यासपीठ मिळाले आहे. रेल्वे स्थानक परिसरात स्थानिक कारागिरांनी विविध वस्तूंचे स्टॉल्स उभारले असून, त्यातून कोकणातील पारंपरिक कला, हस्तकौशल्य आणि स्थानिक उत्पादनांचे दर्शन चाकरमानी तसेच पर्यटकांना होत आहे.
गणेशोत्सवानिमित्त कोकणात मोठ्या संख्येने येणाऱ्या चाकरमान्यांचे आणि त्यांच्या कुटुंबीयांचे या स्टॉल्समुळे विशेष लक्ष वेधले जात आहे. स्थानिक कारागिरांनी तयार केलेल्या विविध आकर्षक वस्तू, हस्तकला आणि पारंपरिक कलाकृती पाहण्याची तसेच खरेदी करण्याची संधी प्रवाशांना मिळत आहे.
अशा उपक्रमांमुळे स्थानिक कलाकार व कारागिरांना आपल्या कलाकृती थेट ग्राहकांपर्यंत पोहोचवून त्यांची विक्री करण्याची संधी मिळत आहे. त्यामुळे त्यांच्या कलागुणांना प्रोत्साहन मिळण्याबरोबरच आत्मविश्वास आणि उत्साहही द्विगुणित होत आहे.
स्थानिक कला, हस्तकला आणि कारागिरांना प्रोत्साहन देणारे असे उपक्रम कोकणच्या समृद्ध सांस्कृतिक परंपरेला नवी ओळख मिळवून देण्यास निश्चितच हातभार लावत आहेत.
