चिमुकल्या हातांनी जवानांना ३२० राख्यांची प्रेमाची भेट; साखळोली क्र. १ शाळेचा ‘एक राखी जवानांसाठी’ उपक्रम उत्साहात
दापोली प्रतिनिधी : अरविंद मांडवकर
दापोली : देशाच्या सीमेवर अहोरात्र कर्तव्य बजावणाऱ्या जवानांप्रती कृतज्ञता, प्रेम आणि आदर व्यक्त करण्यासाठी दापोली तालुक्यातील जि. प. शाळा साखळोली क्र. १ येथील विद्यार्थ्यांनी ‘एक राखी जवानांसाठी’ या उपक्रमात उत्स्फूर्त सहभाग नोंदविला. चिमुकल्या विद्यार्थ्यांनी स्वतःच्या हाताने तयार केलेल्या तब्बल ३२० राख्या जवानांसाठी पाठविल्या असून, त्यासोबत जवानांना आपुलकीने लिहिलेली पत्रेही पाठविण्यात आली आहेत.
दापोली तालुक्यातील ग्रामीण शाळांमध्ये गेल्या दोन दशकांहून अधिक काळ ‘एक राखी जवानांसाठी’ हा राष्ट्रप्रेमाचा उपक्रम सातत्याने राबविला जात आहे. गावतळे ज्युनिअर कॉलेजचे प्राध्यापक तथा आझाद हिंद ट्रस्ट, कोल्हापूरचे प्रवर्तक प्रा. संदिप वारके यांच्या पुढाकारातून हा उपक्रम सुरू आहे.
विद्यार्थ्यांमध्ये राष्ट्रभक्ती, श्रमप्रतिष्ठा, संवेदनशीलता आणि देशसेवेची भावना रुजावी, या उद्देशाने कार्यानुभव विषयाच्या माध्यमातून विद्यार्थ्यांकडून राख्या तयार करून त्या सीमेवरील जवानांपर्यंत पोहोचविल्या जातात.
