जनगणना २०२७ च्या कामकाजाची जिल्हाधिकारी तृप्ती धोडमिसे यांच्याकडून प्रत्यक्ष पाहणी.
जनगणना २०२७ च्या कामकाजाची जिल्हाधिकारी तृप्ती धोडमिसे यांच्याकडून प्रत्यक्ष पाहणी.
एकही घर वगळले जाणार नाही याची दक्षता घ्या; नागरिकांनाही सहकार्याचे आवाहन
कुडाळ — जनगणना २०२७ अंतर्गत सुरू असलेल्या पहिल्या टप्प्यातील घरगणना आणि घरयादी तयार करण्याच्या कामकाजाचा आढावा घेण्यासाठी सिंधुदुर्ग जिल्हाधिकारी Trupti Dhodmise यांनी कुडाळ तालुक्यातील पिंगुळी येथील देऊळवाडी परिसराला भेट देऊन प्रत्यक्ष क्षेत्रीय पाहणी केली. यावेळी त्यांनी जनगणना प्रक्रियेतील विविध बाबींची सखोल माहिती घेत कामकाजाची गुणवत्ता आणि अचूकता तपासली.
देऊळवाडी येथील रुपाली कृष्णा मसुरकर यांच्या निवासस्थानी भेट देऊन जिल्हाधिकारी धोडमिसे यांनी प्रत्यक्ष घरगणना प्रक्रियेचे निरीक्षण केले. यावेळी प्रगणक आणि पर्यवेक्षक यांनी त्यांच्या उपस्थितीत संबंधित कुटुंबाची घरगणना पूर्ण केली. घरगणना करताना विचारण्यात येणारे प्रश्न, माहिती नोंदविण्याची पद्धत तसेच डिजिटल माध्यमातून माहिती संकलनाची प्रक्रिया याबाबत त्यांनी माहिती घेतली.
यानंतर जिल्हाधिकारी धोडमिसे यांनी जनगणना पर्यवेक्षक आणि प्रगणकांशी संवाद साधून प्रत्यक्ष कामकाजादरम्यान येणाऱ्या अडचणी, नागरिकांचा प्रतिसाद तसेच माहिती संकलनातील आव्हानांबाबत चर्चा केली. जनगणना ही देशाच्या विकास नियोजनासाठी अत्यंत महत्त्वाची प्रक्रिया असून प्रत्येक घराची अचूक आणि संपूर्ण नोंद होणे आवश्यक असल्याचे त्यांनी अधोरेखित केले.
यावेळी त्यांनी कोणतेही घर नजरचुकीने वगळले जाणार नाही याची विशेष दक्षता घेण्याच्या सूचना दिल्या. ग्रामपंचायत प्रशासनाच्या प्रभावी सहकार्याने प्रत्येक घराची नोंद अचूकपणे होईल याची खात्री करण्याचे निर्देशही त्यांनी संबंधित यंत्रणेला दिले.
तसेच, एखाद्या घराची घरगणना झाली नसल्याचे आढळल्यास ग्रामीण भागातील नागरिकांनी स्थानिक तलाठी कार्यालयाशी, तर शहरी भागातील नागरिकांनी संबंधित नगरपालिका प्रशासनाशी संपर्क साधून ही बाब निदर्शनास आणून द्यावी, असे आवाहन जिल्हाधिकारी धोडमिसे यांनी केले.
या क्षेत्रीय पाहणीदरम्यान उपविभागीय अधिकारी Aishwarya Kalushe, तहसीलदार Sachin Patil, निवासी नायब तहसीलदार Amarsingh Jadhav, मंडळ अधिकारी Prashant Masurkar, पोलिस पाटील Vaibhav Dhuri तसेच देऊळवाडी गावातील प्रगणक उपस्थित होते.
जिल्हाधिकारी तृप्ती धोडमिसे यांच्या या प्रत्यक्ष क्षेत्रीय पाहणीमुळे जनगणना २०२७ अंतर्गत सुरू असलेले घरगणना व घरयादी तयार करण्याचे काम अधिक अचूक, पारदर्शक आणि सर्वसमावेशक पद्धतीने पूर्ण होण्यास मदत होणार असल्याचा विश्वास प्रशासनाकडून व्यक्त करण्यात आला आहे.
