दोडामार्ग तालुक्यात जंगली गवारेड्याचा विहिरीत पडून मृत्यू
दोडामार्ग l प्रतिनिधी
जंगलातून भटकत शेतात आलेल्या एका भल्या मोठ्या जंगली गवारेड्याचा कठडा नसलेल्या विहिरीत पडून दुर्दैवी मृत्यू झाल्याची घटना सोमवारी सायंकाळी उघडकीस आली. ही घटना माटणे वरचीवाडी परिसरात घडली.
माटणे वरचीवाडी येथील सखाराम हरिश्चंद्र गवस हे आपल्या काजू बागेतील साफसफाईसाठी गेले असता त्यांच्या शेतातील विहिरीत गवारेड्याचा मृतदेह आढळून आला. त्यांनी तात्काळ ही माहिती पोलीस पाटील यांना दिली. त्यानंतर दोडामार्ग वन विभाग कार्यालयाशी संपर्क साधण्यात आला.
माहिती मिळताच वन विभागाची टीम घटनास्थळी दाखल झाली. प्राथमिक पाहणीत संबंधित गवारेडा तीन ते चार दिवसांपूर्वी विहिरीत पडला असावा, अशी शक्यता वन विभागाकडून व्यक्त करण्यात आली आहे. मृतदेह सडण्यास सुरुवात झाली होती. विहिरीत पाणी असल्याने मृत गवारेड्याला बाहेर काढण्याचे काम अडचणीचे ठरत होते.
वन विभागाचे अधिकारी व कर्मचारी गवारेड्याचा मृतदेह विहिरीतून बाहेर काढण्यासाठी प्रयत्न करत होते. यावेळी माटणे वरचीवाडी येथील ग्रामस्थ तसेच पोलीस पाटील यांनी सहकार्य केले.