पालघरच्या जव्हारमध्ये मत्स्यशेती व्यवस्थापनावर एकदिवसीय कार्यशाळा; ८७ शेततळेधारक शेतकऱ्यांचा सहभाग

पालघरच्या जव्हारमध्ये मत्स्यशेती व्यवस्थापनावर एकदिवसीय कार्यशाळा; ८७ शेततळेधारक शेतकऱ्यांचा सहभाग

जव्हार (पालघर) :

सेवा संकल्प अभियानांतर्गत तारापोरवाला सागरी जीवशास्त्रीय संशोधन केंद्र, वांद्रे (पूर्व), मुंबई यांच्या वतीने आणि टाटा मोटर्सच्या आर्थिक सहकार्याने जव्हार येथील बायफ संस्थेच्या कॅम्पसमध्ये ‘मत्स्यशेती : पूर्वतयारी आणि बीज साठवणुकीनंतरचे व्यवस्थापन’ या विषयावर एकदिवसीय कार्यशाळा १६ ऑक्टोबर २०२६ रोजी संपन्न झाली.

बायफ संस्थेच्या उपजीविका सुधार उपक्रमांतर्गत जव्हार तालुक्यातील शेततळेधारक शेतकऱ्यांना मत्स्यबीज वाटप करण्यात येते. या उपक्रमाशी संबंधित ८७ शेततळेधारक शेतकऱ्यांनी कार्यशाळेत सहभाग घेतला. यामध्ये महिला शेतकऱ्यांची उपस्थितीही लक्षणीय होती. मत्स्यशेतीचे शास्त्रीय ज्ञान मिळवून उत्पादन आणि उत्पन्न वाढविण्यासाठी ही कार्यशाळा उपयुक्त ठरली.

कार्यक्रमाचे प्रास्ताविक बायफ संस्थेच्या जव्हार युनिटचे जिल्हा समन्वयक भरत गोडे यांनी केले. त्यांनी कार्यशाळेचा उद्देश स्पष्ट करून विषयतज्ज्ञांची उपस्थितांना ओळख करून दिली.

कार्यशाळेत प्रा. डॉ. शार्दुल गांगण यांनी मत्स्यशेतीसाठी योग्य माशांच्या प्रजातींची निवड, संवर्धनादरम्यान पाण्याच्या गुणवत्तेचे व्यवस्थापन आणि माशांना योग्य खाद्य देण्याबाबत मार्गदर्शन केले. प्रा. डॉ. भरत यादव यांनी मत्स्यशेतीतील आरोग्य व्यवस्थापन आणि प्रकल्प अहवाल तयार करण्यासंदर्भात माहिती दिली. तसेच जीवशास्त्रज्ञ रविंद्र बोंद्रे यांनी मत्स्यबीज साठवणुकीपूर्वी तलावाची करावयाची तयारी आणि मत्स्यबीज संवर्धनाच्या पद्धती याविषयी सविस्तर मार्गदर्शन केले.

कार्यशाळेदरम्यान शेतकऱ्यांनी प्रश्नोत्तरांच्या माध्यमातून आपल्या शंकांचे निरसन करून घेतले. मत्स्यशेती अधिक शास्त्रीय, कार्यक्षम आणि फायदेशीर करण्यासाठी आवश्यक तांत्रिक माहिती या कार्यशाळेतून शेतकऱ्यांना मिळाली. शेतकऱ्यांच्या शंकांचे निरसन आणि आभार प्रदर्शनाने कार्यक्रमाची सांगता झाली.