फ्लाईट उशीर किंवा रद्द? प्रवाशांना मिळू शकते ₹10,000 नुकसानभरपाई
DGCA ची तरतूद बहुतेकांना माहितीच नाही
मुंबई l प्रतिनिधी
देशातील हवाई प्रवाशांसाठी महत्त्वाची माहिती समोर आली आहे. फ्लाईट दोन तासांपेक्षा जास्त उशिरा झाली किंवा रद्द झाली, तर प्रवाशांना ₹10,000 पर्यंत नुकसानभरपाई मिळण्याची तरतूद DGCA ने केली आहे, मात्र या अधिकाराची माहिती बहुतेक प्रवाशांना नसते.
12.5 लाख तिकिटे रद्द, ₹1,100 कोटींचा रिफंड जारी
21 नोव्हेंबर ते 9 डिसेंबर या कालावधीत तब्बल 12.5 लाख हवाई तिकिटे रद्द करण्यात आली असून, यासाठी ₹1,100 कोटींचा परतावा (रिफंड) जारी केला गेला आहे.
तथापि, एवढ्या मोठ्या प्रमाणावर प्रवास विस्कळीत झाल्यानंतरही नुकसानभरपाईबाबत इंडिगो असो किंवा सरकार — कोणाच्याही बाजूने माहिती दिली जात नाही, अशी नाराजी व्यक्त होत आहे.
DGCA ची स्पष्ट तरतूद
- फ्लाईट 2 तासांपेक्षा अधिक उशिरा किंवा रद्द झाल्यास:
→ ₹10,000 नुकसानभरपाई - सामान हरवले, विलंबित झाले किंवा खराब झाले तर:
→ ₹20,000 पर्यंत नुकसानभरपाई
या तरतुदी DGCA च्या नियमांमध्ये स्पष्टपणे नमूद आहेत.
प्रवाशांना अधिकार माहिती नाहीत
तज्ज्ञांच्या मते, बहुतेक प्रवाशांना या आर्थिक भरपाईबद्दल माहिती नसते. कारण:
- सरकारकडून जागरूकता मोहिमांचा अभाव
- विमान कंपन्यांकडून नुकसानभरपाईची माहिती जाणीवपूर्वक न दिले जाणे
- तक्रार प्रक्रियेबाबत स्पष्ट मार्गदर्शन नसणे
याउलट, परदेशातील विमान वाहतूक नियामक संस्थांच्या वेबसाइट्सवर प्रवाशांच्या हक्कांबाबत सविस्तर माहिती, उदाहरणे आणि तक्रार नोंदणी प्रक्रिया स्पष्टपणे दिलेली असते.
तज्ज्ञांचे मत
हवाई प्रवासी संरक्षण संघटनांचे म्हणणे आहे की:
“भारतात बहुतेक प्रवासी नुकसानभरपाई मागतच नाहीत. जागरूकता वाढवली तर लाखो प्रवाशांना थेट आर्थिक दिलासा मिळू शकतो.”
प्रवाशांनी काय करावे?
- फ्लाईट 2 तासांपेक्षा जास्त उशिरा असेल किंवा रद्द झाल्यास लिखित स्वरुपात नुकसानभरपाईची मागणी करावी
- विमान कंपनीने नकार दिल्यास DGCA कडे तक्रार नोंदवावी
- तिकिट, बोर्डिंग पास, SMS/ई-मेल पुरावे जतन करून ठेवावे
देशातील वाढत्या फ्लाईट रद्दीकरणाच्या पार्श्वभूमीवर, DGCA च्या या तरतुदींबद्दल जागरूकता आवश्यक असल्याचे मत व्यक्त केले जात आहे.