भारताचा ऐतिहासिक विजय : न्यूझीलंडला हरवून तिसऱ्यांदा टी-२० विश्वचषक जिंकला
मुंबई l प्रतिनिधी
अहमदाबादमध्ये रविवारी झालेल्या रोमांचक अंतिम सामन्यात भारताने न्यूझीलंडचा तब्बल ९६ धावांनी पराभव करत टी-२० विश्वचषकावर पुन्हा आपले नाव कोरले. या विजयासह भारताने टी-२० विश्वचषक तिसऱ्यांदा जिंकत इतिहास रचला असून स्पर्धेचे विजेतेपद राखणारा आणि विक्रमी तिसरा किताब जिंकणारा पहिला संघ ठरला.
अहमदाबादमधील नरेंद्र मोदी स्टेडियमवर झालेल्या या अंतिम सामन्याला तब्बल ८६ हजारांहून अधिक प्रेक्षक उपस्थित होते. प्रथम फलंदाजी करताना भारताने दमदार खेळ करत २० षटकांत ५ बाद २५५ धावांचा डोंगर उभारला. भारतीय संघाच्या डावात संजू सॅमसनने सर्वाधिक चमकदार खेळी केली. सॅमसनने अवघ्या ४६ चेंडूत ८९ धावा करत चौकार-षटकारांची आतषबाजी केली आणि भारतीय डावाला भक्कम पाया मिळवून दिला.
२५६ धावांच्या अवघड लक्ष्याचा पाठलाग करताना न्यूझीलंडच्या फलंदाजांना भारतीय गोलंदाजांसमोर टिकाव धरता आला नाही.
सुरुवातीपासूनच भारताने आक्रमक गोलंदाजी करत न्यूझीलंडवर दबाव निर्माण केला. परिणामी न्यूझीलंडचा संपूर्ण संघ १५९ धावांवरच गारद झाला आणि भारताने ९६ धावांनी दणदणीत विजय मिळवला.
भारतीय गोलंदाजांमध्ये जसप्रीत बुमराहने उत्कृष्ट कामगिरी केली. बुमराहने आपल्या चार षटकांत केवळ १५ धावा देत चार महत्त्वाच्या विकेट घेतल्या. त्याच्या अचूक आणि धारदार गोलंदाजीमुळे न्यूझीलंडचा डाव कोलमडला. या शानदार कामगिरीसाठी बुमराहला सामनावीर पुरस्काराने गौरविण्यात आले.
या विजयासह भारताने टी-२० विश्वचषकात नवा इतिहास रचला आहे. भारताने याआधी २००७ मध्ये पहिल्यांदा, त्यानंतर २०२४ मध्ये आणि आता २०२६ मध्ये विजेतेपद पटकावले आहे. यंदा भारताने केवळ विजेतेपद जिंकले नाही, तर गतविजेते म्हणून ट्रॉफी यशस्वीरित्या राखण्याचाही पराक्रम केला.
विशेष म्हणजे भारत हा टी-२० विश्वचषक जिंकणारा पहिला यजमान देशही ठरला आहे. घरच्या मैदानावर हजारो चाहत्यांच्या उपस्थितीत भारतीय संघाने शानदार प्रदर्शन करत हा ऐतिहासिक विजय मिळवला.
दरम्यान, न्यूझीलंड संघानेही स्पर्धेत चांगली कामगिरी करत अंतिम फेरीपर्यंत मजल मारली होती. स्पर्धेच्या सुरुवातीला न्यूझीलंड अंतिम फेरीत पोहोचेल अशी अपेक्षा फार कमी जणांनी व्यक्त केली होती. मात्र त्यांनी दमदार खेळ करत दक्षिण आफ्रिकेसारख्या मजबूत संघावर विजय मिळवून अंतिम सामन्यात प्रवेश केला. तरीही अंतिम लढतीत भारतीय संघासमोर त्यांना टिकाव धरता आला नाही.
भारतीय संघाच्या या ऐतिहासिक विजयामुळे देशभरात आनंद आणि जल्लोषाचे वातावरण निर्माण झाले असून क्रिकेटप्रेमींनी संघाचे जोरदार स्वागत केले आहे. या ऐतिहासिक विजयानंतर संपूर्ण देशभरात जल्लोषाचे वातावरण निर्माण झाले असून चाहत्यांकडून भारतीय संघावर अभिनंदनाचा वर्षाव होत आहे