भारतीय तटरक्षक दलाच्या ताफ्यात पहिले स्वदेशी होवरक्राफ्ट एच-५६१ सेवेत दाखल

भारताच्या सागरी सुरक्षेला बळकटी देणारा महत्त्वपूर्ण टप्पा गाठत भारतीय तटरक्षक दलाने पहिले स्वदेशी बनावटीचे होवरक्राफ्ट (Hovercraft) एच-५६१ सेवेत दाखल केले आहे. गोव्यातील चौगुले अँड कंपनी प्रायव्हेट लिमिटेडच्या रसाईम शिपयार्डमध्ये १८ जून २०२६ रोजी झालेल्या विशेष समारंभात या एअर कुशन व्हेईकलचे (ACV) औपचारिक उद्घाटन करण्यात आले.

भारतीय तटरक्षक दलाने ऑक्टोबर २०२४ मध्ये ३८७ कोटी रुपयांच्या सहा होवरक्राफ्टच्या करारावर स्वाक्षरी केली होती. त्यातील पहिले जहाज म्हणून एच-५६१ ताफ्यात दाखल झाले आहे. भारतीय तटरक्षक दलाचे वरिष्ठ अधिकारी तसेच जहाजबांधणी उद्योगातील मान्यवर या सोहळ्यास उपस्थित होते.

ग्रिफॉन होवरवर्कच्या आधुनिक डिझाइनवर आधारित असलेल्या या होवरक्राफ्टमध्ये ५० टक्क्यांहून अधिक स्वदेशी घटकांचा वापर करण्यात आला आहे. भारताच्या सुमारे ७,६०० किलोमीटर लांबीच्या किनारपट्टीवर जलद गस्त, टेहळणी, शोध व बचाव मोहीम तसेच आपत्कालीन मदतकार्यासाठी हे वाहन अत्यंत उपयुक्त ठरणार आहे.

या प्रकल्पामुळे देशाच्या सागरी सुरक्षा व्यवस्थेला अधिक बळ मिळणार असून भारताच्या जहाजबांधणी क्षमतेचेही जगासमोर दर्शन घडणार आहे. ‘मेक इन इंडिया’ आणि ‘आत्मनिर्भर भारत’ अभियानाला चालना देणारा हा एक महत्त्वाचा मैलाचा दगड मानला जात आहे.