महाराष्ट्रातील ४ शिक्षकांची राष्ट्रीय शिक्षक पुरस्कार २०२६ साठी निवड

महाराष्ट्रातील ४ शिक्षकांची राष्ट्रीय शिक्षक पुरस्कार २०२६ साठी निवड

५ सप्टेंबरला राष्ट्रपती द्रौपदी मुर्मू यांच्या हस्ते नवी दिल्लीतील विज्ञान भवनात होणार पुरस्कार वितरण

मुंबई :

शिक्षण क्षेत्रात नाविन्यपूर्ण आणि उल्लेखनीय उपक्रम राबविणाऱ्या देशभरातील ४८ शिक्षकांची राष्ट्रीय शिक्षक पुरस्कार २०२६ साठी निवड करण्यात आली आहे. यामध्ये महाराष्ट्रातील चार शिक्षकांचा समावेश असून, राज्याच्या शैक्षणिक क्षेत्रासाठी ही अभिमानाची बाब मानली जात आहे.

महाराष्ट्रातून डॉ. कविता नृसिंहराव गित्ते (बीड), कुंदा जयवंत बच्छाव (नाशिक), वैभव वसंतराव कुलकर्णी (लातूर) आणि शिवप्रसाद अरविंद टिंगरे (सातारा) यांची राष्ट्रीय शिक्षक पुरस्कारासाठी निवड झाली आहे.

शिक्षक दिनाचे औचित्य साधून ५ सप्टेंबर २०२६ रोजी नवी दिल्लीतील विज्ञान भवन येथे राष्ट्रपती द्रौपदी मुर्मू यांच्या हस्ते पुरस्कारांचे वितरण करण्यात येणार आहे.

शिक्षण क्षेत्रात विद्यार्थ्यांच्या सर्वांगीण विकासासाठी नाविन्यपूर्ण उपक्रम राबविणाऱ्या शिक्षकांच्या कार्याची राष्ट्रीय स्तरावर दखल घेण्यात आली आहे. महाराष्ट्रातील चारही शिक्षकांनी आपल्या कार्यातून शिक्षण क्षेत्रात उल्लेखनीय योगदान दिले आहे.

राज्यातील चारही पुरस्कारविजेत्या शिक्षकांसह देशभरातील ४८ पुरस्कारविजेत्या शिक्षकांचे उपमुख्यमंत्री सुनेत्रा पवार यांनी अभिनंदन केले असून, त्यांच्या पुढील शैक्षणिक कार्यासाठी शुभेच्छा दिल्या आहेत.

या निवडीमुळे महाराष्ट्रातील शिक्षकांच्या नाविन्यपूर्ण कार्याला राष्ट्रीय स्तरावर सन्मान मिळाला असून, राज्यातील शिक्षण क्षेत्रासाठी ही निश्चितच गौरवास्पद बाब आहे.