महिला आयोगाच्या अध्यक्षपदी संयोगिताराजे छत्रपतींची नियुक्ती करावी; राज्य सरकारकडे मागणी
मुंबई : राज्य महिला आयोगाच्या अध्यक्षपदी संयोगिता राजे छत्रपती यांची नियुक्ती करण्यात यावी, अशी मागणी काही सामाजिक घटकांकडून पुढे येत आहे. महिलांना न्याय मिळवून देण्यासाठी सक्षम आणि प्रभावी नेतृत्व म्हणून त्यांचे नाव पुढे करण्यात येत आहे.
मागणी करणाऱ्यांच्या मते, संयोगिताराजे छत्रपती यांचे व्यक्तिमत्त्व, सामाजिक भान आणि जनसंपर्क यामुळे त्या राज्यातील सर्व स्तरांतील महिलांचे प्रश्न प्रभावीपणे मांडू शकतात. गरीब असो वा श्रीमंत, कोणत्याही महिलेला अन्याय होऊ न देता न्याय मिळवून देण्याची क्षमता त्यांच्या नेतृत्वात असल्याचा विश्वास व्यक्त केला जात आहे.
तसेच, संभाजीराजे छत्रपती यांच्या सहचारिणी म्हणून त्या सामाजिक व सांस्कृतिक उपक्रमांमध्ये सक्रिय असल्याचेही नमूद करण्यात आले आहे. दरवर्षी रायगड किल्ला येथे होणाऱ्या राज्याभिषेक सोहळ्याच्या आयोजनात त्यांचा सहभाग उल्लेखनीय असल्याचे सांगितले जाते.
मागणीकर्त्यांचे असेही म्हणणे आहे की, छत्रपती घराण्याचा वारसा आणि विचार पुढे नेणाऱ्या या नेतृत्वामुळे महिला आयोगात सकारात्मक बदल घडू शकतात. राज्यातील महिलांच्या हक्कांसाठी ठोस पावले उचलण्याची क्षमता त्यांच्या नेतृत्वात असल्याचा दावा केला जात आहे.
दरम्यान, या मागणीबाबत राज्य सरकारकडून अद्याप कोणतीही अधिकृत भूमिका स्पष्ट करण्यात आलेली नाही. त्यामुळे आगामी काळात या विषयावर काय निर्णय घेतला जातो, याकडे सर्वांचे लक्ष लागले आहे.