रत्नागिरीत आज ‘पोषण माह व मानसिक आरोग्य कार्यशाळा’; मोफत आरोग्य तपासणी शिबिराचे आयोजन
रत्नागिरीत आज ‘पोषण माह व मानसिक आरोग्य कार्यशाळा’; मोफत आरोग्य तपासणी शिबिराचे आयोजन
रत्नागिरी :
जिल्हा परिषद महिला व बालविकास विभाग आणि आरोग्य विभागाच्या संयुक्त विद्यमाने गुरुवार, दि. ८ ऑक्टोबर २०२६ रोजी स्वातंत्र्यवीर सावरकर नाट्यगृह येथे **‘पोषण माह व मानसिक आरोग्य कार्यशाळा-२०२६’**चे आयोजन करण्यात आले आहे. महिला, किशोरवयीन मुले-मुली तसेच मातांच्या सर्वांगीण आरोग्याबाबत जनजागृती निर्माण करण्याच्या उद्देशाने या कार्यशाळेचे आयोजन करण्यात आले आहे.
कार्यक्रमाची सुरुवात सकाळी ९ वाजता पूर्वतयारी व आरोग्य तपासणी शिबिराने होणार आहे. या शिबिरात उपस्थितांची एचबी, शुगर तसेच इतर वैद्यकीय तपासण्या मोफत करण्यात येणार आहेत.
सकाळी १०.३० वाजता मुख्य कार्यसत्राला सुरुवात होणार असून विविध क्षेत्रांतील तज्ज्ञ मार्गदर्शन करणार आहेत. शासकीय नर्सिंग स्कूलच्या प्राचार्य श्रुती आंबेकर किशोरावस्थेतील शारीरिक व मानसिक आरोग्याची काळजी या विषयावर मार्गदर्शन करतील. यावेळी स्त्री भ्रूणहत्येविषयी जनजागृती करणारे प्रबोधनपर पथनाट्यही सादर केले जाणार आहे.
प्रादेशिक मनोरुग्णालयाच्या मानसोपचार तज्ज्ञ डॉ. हरिणाक्षी गोसावी गरोदर व स्तनदा मातांमधील प्रसूतीपश्चात नैराश्य आणि त्यावरील उपाययोजनांबाबत मार्गदर्शन करणार आहेत. यासोबतच सेविकांची प्रेरणादायी ‘यशोगाथा’ सादर केली जाणार आहे.
जिल्हा रुग्णालयाच्या आहारतज्ज्ञ कविता जाधव संतुलित आहार आणि पोषणाबाबत मार्गदर्शन करणार आहेत. तसेच बालरोगतज्ज्ञांचे मार्गदर्शन आणि ‘पोषण मंगळागौरी’ हा विशेष पूरक उपक्रम कार्यशाळेचे आकर्षण ठरणार आहे.
दुपारी १ वाजता समारोप व आभार प्रदर्शनाने कार्यशाळेची सांगता होणार आहे. महिला, किशोरवयीन मुले-मुली आणि मातांच्या आरोग्याबाबत आवश्यक माहिती तसेच मार्गदर्शन मिळण्याच्या दृष्टीने ही कार्यशाळा उपयुक्त ठरणार आहे.
