लोकसभा अध्यक्ष ओम बिर्ला यांच्याविरोधात अविश्वास ठरावाची नोटीस
नवी दिल्ली :
विरोधी पक्षांनी लोकसभा अध्यक्ष ओम बिर्ला यांच्या विरोधात अविश्वास ठराव मांडण्याची प्रक्रिया सुरू केली आहे. यासाठी विरोधी पक्षांच्या खासदारांनी स्वाक्षरी केलेली लेखी नोटीस लोकसभा महासचिवांकडे सादर करण्यात आली असल्याची माहिती समोर आली आहे.
भारतीय संविधानानुसार लोकसभा अध्यक्षांना सभागृहाने मंजूर केलेल्या ठरावाद्वारे पदावरून हटविण्याची तरतूद आहे. मात्र या पदाच्या स्वायत्ततेचे आणि प्रतिष्ठेचे रक्षण करण्यासाठी ही प्रक्रिया जाणूनबुजून कठोर ठेवण्यात आली आहे.
नियमांनुसार अविश्वास ठराव मांडण्यापूर्वी किमान १४ दिवसांची लेखी सूचना देणे बंधनकारक असते. तसेच हा ठराव सभागृहात चर्चेसाठी स्वीकारला जाण्यासाठी किमान ५० खासदारांचा पाठिंबा आवश्यक असतो.
ठराव चर्चेसाठी मंजूर झाल्यानंतर त्यावर लोकसभेत चर्चा होईल. हा ठराव मंजूर होण्यासाठी लोकसभेतील सर्व तत्कालीन सदस्यांच्या बहुमताची आवश्यकता असते, ज्याला “प्रभावी बहुमत” असे म्हटले जाते.
चर्चेदरम्यान लोकसभा अध्यक्ष स्वतः अध्यक्षपद भूषवू शकत नाहीत. मात्र ते लोकसभेचे सदस्य म्हणून चर्चेत सहभागी होऊ शकतात आणि मतदान करण्याचा अधिकार त्यांना असतो.