ज्येष्ठ अभिनेते सुधीर दळवी यांना शिर्डी साई मंदिर ट्रस्टकडून आर्थिक मदतीची परवानगी
मुंबई | प्रतिनिधी
मुंबई उच्च न्यायालयाच्या औरंगाबाद खंडपीठाने सेप्सिस या गंभीर आजारावर उपचार घेत असलेले ज्येष्ठ अभिनेते सुधीर दळवी यांना आर्थिक मदत देण्यास शिर्डी साई बाबा संस्थान ट्रस्टला परवानगी दिली आहे. या निर्णयामुळे दळवी यांच्या उपचारासाठी आवश्यक असलेली आर्थिक मदत ट्रस्टकडून उपलब्ध होण्याचा मार्ग मोकळा झाला असून, त्यांच्या कुटुंबीयांना मोठा दिलासा मिळाला आहे.
८६ वर्षीय सुधीर दळवी हे गेल्या काही काळापासून प्रकृती अस्वास्थ्यामुळे रुग्णालयात उपचार घेत आहेत. त्यांना सेप्सिस चा संसर्ग झाल्याने त्यांची प्रकृती गंभीर असल्याचे डॉक्टरांनी सांगितले आहे. उपचाराचा खर्च वाढत चालल्याने कुटुंबीयांसमोर आर्थिक अडचणी उभ्या राहिल्या होत्या. याच पार्श्वभूमीवर शिर्डी साई बाबा संस्थान ट्रस्टकडून मदत देण्यास परवानगी मिळावी, यासाठी न्यायालयात अर्ज दाखल करण्यात आला होता.
या प्रकरणाची गंभीरता लक्षात घेऊन औरंगाबाद खंडपीठाने मानवीतेच्या दृष्टिकोनातून विचार करत ट्रस्टला आर्थिक मदत देण्यास परवानगी दिली. साई बाबांच्या सेवेतून उभ्या राहिलेल्या निधीतून एका कलाकाराच्या जीवनरक्षणासाठी मदत देणे हे सामाजिक बांधिलकीचे उत्तम उदाहरण असल्याचे मत अनेकांनी व्यक्त केले आहे.
सुधीर दळवी हे मराठी आणि हिंदी चित्रपटसृष्टीतील एक अत्यंत आदरणीय नाव आहे. विशेषतः मनोज कुमार दिग्दर्शित ‘शिर्डी के साई बाबा’ या गाजलेल्या चित्रपटात त्यांनी साकारलेली साई बाबांची भूमिका प्रचंड लोकप्रिय ठरली होती. ही भूमिका इतकी प्रभावी होती की पुढे त्यांच्या ओळखीचा तोच चेहरा बनला. प्रेक्षकांच्या मनात त्यांनी साई बाबा म्हणजेच सुधीर दळवी अशी प्रतिमा कोरली.
या चित्रपटानंतर त्यांनी अनेक चित्रपट, मालिका आणि नाट्यप्रयोगांतून काम केले. मात्र ‘साई बाबा’ ही भूमिका त्यांच्या कारकिर्दीतील मैलाचा दगड ठरली. लाखो भाविकांच्या श्रद्धेचा विषय असलेल्या साई बाबांची भूमिका अत्यंत श्रद्धेने आणि प्रभावीपणे साकारत दळवी यांनी अभिनय क्षेत्रात आपले वेगळे स्थान निर्माण केले होते.
आज त्यांच्या आयुष्याच्या संध्याकाळी त्यांना आरोग्याच्या मोठ्या संकटाला सामोरे जावे लागत आहे. अशा परिस्थितीत शिर्डी साई बाबा संस्थान ट्रस्टकडून मिळणारी मदत ही केवळ आर्थिक आधारच नव्हे, तर त्यांच्या आयुष्यभराच्या कलासाधनेला मिळालेली मानवी सन्मानाची पावती असल्याचे मानले जात आहे.
न्यायालयाच्या या निर्णयाचे कलाकार, सामाजिक संस्था आणि सर्वसामान्य नागरिकांकडून स्वागत करण्यात येत आहे. अनेकांनी सुधीर दळवी यांच्या लवकर बरे होण्यासाठी प्रार्थनाही व्यक्त केल्या आहेत. शिर्डी साई बाबा संस्थान ट्रस्ट कडील या मदतीमुळे त्यांच्या उपचारात कोणतीही अडचण येणार नाही, अशी आशा त्यांच्या चाहत्यांना आहे.
या घटनेमुळे कला क्षेत्रातील ज्येष्ठ कलाकारांच्या सामाजिक सुरक्षिततेचा प्रश्न पुन्हा एकदा ऐरणीवर आला असून, अशा कलाकारांसाठी कायमस्वरूपी आधार व्यवस्था असावी, अशीही मागणी होत आहे.