कणकवली हादरली ; नागवेकर हॉस्पिटल प्रकरणात डॉक्टरांसह ६० जणांवर गुन्हे
कणकवली
कणकवली शहरातील नागवेकर हॉस्पिटलमध्ये साध्या मानेवरील गाठीच्या शस्त्रक्रियेनंतर एका तरुणीचा मृत्यू झाला आणि त्यानंतर उसळलेल्या संतापातून रुग्णालयाची मोठ्या प्रमाणावर तोडफोड झाली. या धक्कादायक घटनेने संपूर्ण कणकवली तालुका हादरून गेला असून, या प्रकरणी परस्परविरोधी फिर्यादी दाखल झाल्या आहेत. एकीकडे मृत तरुणी कस्तुरी चंद्रकांत पाताडे हिच्या वडिलांच्या फिर्यादीवरून दोन डॉक्टरांवर गुन्हा दाखल करण्यात आला आहे, तर दुसरीकडे रुग्णालयाची तोडफोड, मारहाण व नुकसानप्रकरणी ५० ते ६० जणांच्या जमावावर गंभीर स्वरूपाचे गुन्हे नोंदवण्यात आले आहेत.
कस्तुरी पाताडे (रा. कणकवली) हिच्या वडिलांनी चंद्रकांत आकाराम पाताडे यांनी दिलेल्या फिर्यादीत नमूद केल्याप्रमाणे, कस्तुरीच्या मानेच्या वरच्या भागात गाठ आली होती. त्यावर उपचारासाठी कुटुंबीय तिला नागवेकर हॉस्पिटलमध्ये घेऊन गेले. शुक्रवारी सायंकाळी सुमारे ५.३० वाजण्याच्या सुमारास डॉ.अनंत नागवेकर व त्यांचे पुत्र डॉ.मयूर नागवेकर यांनी गाठ काढण्याची शस्त्रक्रिया केली. मात्र शस्त्रक्रियेनंतर कस्तुरीची प्रकृती झपाट्याने खालावू लागली. परिस्थिती गंभीर झाल्याने डॉक्टरांच्या सल्ल्यानुसार तिला तातडीने कोल्हापूर येथील रुग्णालयात हलवण्यात आले. मात्र तेथे उपचार सुरू असतानाच कस्तुरीचा मृत्यू झाला.
या मृत्यूबाबत पाताडे कुटुंबीयांनी गंभीर आरोप केले आहेत. योग्य तपासणी न करता, आवश्यक काळजी व दक्षता न घेता शस्त्रक्रिया करण्यात आल्यामुळेच कस्तुरीचा मृत्यू झाल्याचा दावा फिर्यादीत करण्यात आला आहे. मुलीच्या जीवाला धोका निर्माण होऊ शकतो याची जाणीव असूनही निष्काळजीपणे शस्त्रक्रिया केल्याचा आरोप करत डॉ.अनंत नागवेकर व डॉ.मयूर नागवेकर यांच्याविरोधात भारतीय दंड न्यायसंहितेतील संबंधित कलमान्वये गुन्हा दाखल करण्यात आला आहे. या प्रकरणामुळे वैद्यकीय निष्काळजीपणाचा गंभीर मुद्दा पुन्हा एकदा ऐरणीवर आला आहे.
दरम्यान, कस्तुरीच्या मृत्यूनंतर कणकवलीत वातावरण चिघळले. संतप्त नातेवाइक व नागरिकांनी कस्तुरीचा मृतदेह घेऊन नागवेकर हॉस्पिटलमध्ये धडक दिली. यानंतर रुग्णालयात गोंधळ उडाला. डॉ. अनंत नागवेकर यांनी दिलेल्या फिर्यादीत म्हटले आहे की, १४ डिसेंबर रोजी दुपारी सुमारे १२.१० वाजण्याच्या सुमारास ५० ते ६० जणांचा जमाव रुग्णालयात घुसला. जमावाने आरडाओरड करत डॉक्टरांना बोलवा अशी मागणी केली, कर्मचाऱ्यांना शिवीगाळ केली आणि हाताच्या थापटांनी मारहाण केली. या गोंधळात डॉ. नागवेकर यांची पत्नी व सून यांनाही मारहाण झाल्याचा आरोप आहे.
जमावाने रुग्णालयातील बेंचेस, काचा, पंखे, वायरिंग, लाईट्स आदींची मोठ्या प्रमाणावर तोडफोड केली असून सुमारे १५ लाख रुपयांचे नुकसान झाल्याचा दावा फिर्यादीत करण्यात आला आहे. या प्रकरणी ५० ते ६० जणांवर गुन्हा दाखल करण्यात आला असून, त्यापैकी १५ ते १६ जणांची नावे निश्चित झाल्याचे समजते. आरोपींविरोधात महाराष्ट्र वैद्यकीय सेवा व्यक्ती व वैद्यकीय संस्था (हिंसाचार व नुकसान प्रतिबंध) अधिनियम २०१० तसेच भारतीय दंड न्यायसंहितेतील विविध कलमान्वये गुन्हे दाखल करण्यात आले आहेत. मात्र, तपासाच्या कारणास्तव पोलिसांकडून संशयितांची नावे जाहीर करण्याबाबत सध्या टाळाटाळ करण्यात येत आहे.
या घटनेच्या पार्श्वभूमीवर कणकवली शहरात तणावपूर्ण शांतता आहे. नागवेकर हॉस्पिटल परिसरात पोलीसांचा चोख बंदोबस्त तैनात करण्यात आला असून, कोणताही अनुचित प्रकार घडू नये यासाठी खबरदारी घेतली जात आहे. पोलिसांकडून घटनास्थळी पंचनामा करण्याची प्रक्रिया सुरू असून, वैद्यकीय उपचारातील निष्काळजीपणा की उपचारातील चूक, तसेच जमावाने केलेली तोडफोड आणि हिंसाचार—या दोन्ही बाजूंनी सखोल तपास करून कायद्यानुसार कठोर कारवाई करण्यात येईल, असे संकेत पोलिस सूत्रांनी दिले आहेत.
साध्या गाठीच्या शस्त्रक्रियेसाठी गेलेली तरुणी मृत्यूमुखी पडते आणि त्यानंतर संपूर्ण शहर तणावाच्या छायेत जाते, हे कणकवलीसाठी अत्यंत धक्कादायक आणि अस्वस्थ करणारे वास्तव आहे. या प्रकरणातून एकीकडे आरोग्य व्यवस्थेतील जबाबदारी, पारदर्शकता आणि डॉक्टरांची दक्षता यावर प्रश्नचिन्ह निर्माण झाले आहे, तर दुसरीकडे कायदा हातात घेणाऱ्या जमावावर कठोर कारवाईची गरज अधोरेखित झाली आहे. या दुहेरी गुन्हेनोंदीमुळे नागवेकर हॉस्पिटल प्रकरण आता केवळ स्थानिक घटना न राहता, संपूर्ण समाजाला अंतर्मुख करणारा गंभीर प्रश्न ठरत आहे.