मुंबई–गोवा महामार्गावर ‘रस्ता सत्याग्रह’
४९० किमी पायी चालत चैतन्य पाटलांनी उघड केली प्रकल्पाची विदारक वास्तवता
मुंबई–गोवा महामार्गाच्या रखडलेल्या आणि धोकादायक अवस्थेमुळे वाढलेल्या जनक्षोभाच्या पार्श्वभूमीवर रायगड जिल्ह्यातील २८ वर्षीय तरुण कार्यकर्ते चैतन्य पाटील यांनी थेट कृतीचा मार्ग स्वीकारला. तब्बल ४९० किलोमीटरचा संपूर्ण महामार्ग त्यांनी पायी चालत २९ दिवसांत पूर्ण केला. महामार्गावरील सुरक्षेतील गंभीर त्रुटी, अपघातप्रवण ठिकाणे आणि प्रवाशांच्या जीवाला धोका निर्माण करणाऱ्या समस्या यांचे सखोल दस्तऐवजीकरण केले.
‘रस्ता सत्याग्रह’ असे नाव दिलेल्या या मोहिमेदरम्यान पाटील यांनी NH-66 वरील खड्डे, अपूर्ण पूल, गायब झालेले दिशादर्शक फलक, अरुंद व धोकादायक वळणे अशा ५९ गंभीर ठिकाणांची नोंद केली. छायाचित्रे, जीपीएस-टॅग केलेले पुरावे आणि क्यूआर कोडयुक्त डिजिटल माहितीच्या माध्यमातून त्यांनी सविस्तर अहवाल तयार केला. हा अहवाल शिवसेना (उद्धव बाळासाहेब ठाकरे) पक्षाचे खासदार अरविंद सावंत यांच्यामार्फत केंद्रीय रस्ते वाहतूक व महामार्ग मंत्री नितीन गडकरी यांच्याकडे सादर करण्यात आला.
रायगड जिल्ह्यातील कासू गावातील अभियांत्रिकी पदवीधर असलेले चैतन्य पाटील २०१९ पासून मुंबई–गोवा महामार्ग प्रकल्पातील त्रुटींविरोधात सातत्याने आवाज उठवत आहेत. त्यांच्या या प्रयत्नांमुळे काही भागांमध्ये तात्पुरत्या दुरुस्तीचे कामही हाती घेण्यात आले असून, हा महामार्ग सुरक्षित आणि पूर्णत्वास जावा, यासाठी त्यांनी प्रशासनाला थेट कृतीचे आवाहन केले आहे.