Pune महसूल विभागात मोठा घोटाळा उघड; कलम १५५ चा गैरवापर, ४२४ प्रकरणांची चौकशी
पुणे : Pune येथील महसूल विभागात मोठा प्रशासकीय घोटाळा उघडकीस आला असून यामुळे प्रशासनात एकच खळबळ उडाली आहे. प्राथमिक चौकशीत ‘महाराष्ट्र जमीन महसूल संहिता’च्या कलम १५५ चा उघड गैरवापर झाल्याचे समोर आले आहे.
हे कलम प्रामुख्याने लिपिकीय चुका दुरुस्त करण्यासाठी वापरण्यात येते. मात्र काही प्रकरणांमध्ये या अधिकारांचा वापर करून जमिनीच्या नोंदींमध्ये बेकायदेशीर फेरफार केल्याचा आरोप आहे. विशेषतः ७/१२ उतारे आणि मालकी हक्काच्या नोंदींमध्ये बदल करण्यात आल्याचे निष्पन्न झाले आहे.
या संदर्भात तब्बल ४२४ संशयास्पद प्रकरणांची ओळख पटली असून, प्रकरणाची गंभीरता लक्षात घेता विभागीय आयुक्तांनी तातडीने कठोर कारवाईचे आदेश दिले आहेत. संबंधित अधिकारी तसेच या व्यवहारांमधून लाभ घेणाऱ्या व्यक्तींवर कडक कारवाई केली जाणार असल्याचे स्पष्ट करण्यात आले आहे.
या कारवाईचा मुख्य उद्देश म्हणजे जमीन व्यवहारांमध्ये पुन्हा पारदर्शकता आणणे आणि सरकारी नोंदींमध्ये फेरफार करणाऱ्यांवर कठोर शिक्षा करणे हा आहे. या प्रकरणामुळे महसूल विभागाच्या कार्यपद्धतीवर प्रश्नचिन्ह निर्माण झाले असून, पुढील काळात आणखी धक्कादायक माहिती समोर येण्याची शक्यता वर्तवली जात आहे.