एमआयआरव्ही तंत्रज्ञानयुक्त प्रगत अग्नी क्षेपणास्त्राची यशस्वी चाचणी
भारताने संरक्षण क्षेत्रात आणखी एक महत्त्वपूर्ण टप्पा गाठत एमआयआरव्ही (Multiple Independently Targeted Re-entry Vehicle) प्रणाली असलेल्या प्रगत अग्नी क्षेपणास्त्राची यशस्वी चाचणी केली आहे. ही चाचणी ८ मे २०२६ रोजी डॉ. ए. पी. जे. अब्दुल कलाम बेट येथून घेण्यात आली.
या प्रगत क्षेपणास्त्राची उड्डाण चाचणी हिंदी महासागर क्षेत्रातील विस्तृत भौगोलिक परिसरात विविध लक्ष्यांवर करण्यात आली. विशेष म्हणजे, या क्षेपणास्त्राने एकाच वेळी अनेक स्वतंत्र लक्ष्यांवर अचूक प्रहार करण्याची क्षमता दर्शवित विविध पेलोड्ससह यशस्वी कामगिरी केली.
एमआयआरव्ही तंत्रज्ञानामुळे एकाच क्षेपणास्त्रातून अनेक वॉरहेड्स वेगवेगळ्या लक्ष्यांवर पाठवता येतात. त्यामुळे भारताच्या सामरिक आणि संरक्षण क्षमतेत मोठी वाढ झाल्याचे मानले जात आहे.
या यशस्वी चाचणीमुळे भारतीय संरक्षण संशोधन आणि क्षेपणास्त्र तंत्रज्ञानाच्या प्रगतीला नवी दिशा मिळाल्याचे संरक्षण तज्ज्ञांकडून सांगितले जात आहे.