‘मेड इन इंडिया’ C-295 लष्करी विमानाचे यशस्वी पहिले उड्डाण; संरक्षण क्षेत्रात भारताची मोठी झेप
‘मेड इन इंडिया’ C-295 लष्करी विमानाचे यशस्वी पहिले उड्डाण; संरक्षण क्षेत्रात भारताची मोठी झेप
वडोदरा | प्रतिनिधी
भारताच्या संरक्षण उत्पादन क्षेत्रासाठी ऐतिहासिक ठरणाऱ्या घडामोडीत टाटा समूह आणि एअरबसच्या भागीदारीत तयार करण्यात आलेल्या देशातील पहिल्या ‘मेड इन इंडिया’ C-295 लष्करी वाहतूक विमानाने यशस्वी पहिले चाचणी उड्डाण पूर्ण केले आहे. गुजरातमधील वडोदरा येथील अंतिम असेंब्ली लाईनवरून या विमानाने पहिले उड्डाण करत भारतीय संरक्षण उद्योगाच्या आत्मनिर्भरतेला नवी दिशा दिली आहे.
टाटा ॲडव्हान्स्ड सिस्टीम्स लिमिटेड (TASL) आणि एअरबस यांच्या संयुक्त सहकार्याने वडोदरा येथील अत्याधुनिक प्रकल्पात C-295 विमानांची निर्मिती सुरू आहे. एअरबस डिफेन्सने दिलेल्या माहितीनुसार, हे चाचणी उड्डाण उत्पादनानंतरच्या चाचणी प्रक्रियेतील एक महत्त्वाचा टप्पा असून भारतीय हवाई दलाला यावर्षी पहिले स्वदेशी निर्मित C-295 विमान सुपूर्द करण्याच्या दिशेने मोठी प्रगती झाली आहे.
भारताने सप्टेंबर २०२१ मध्ये स्पेनसोबत ५६ C-295 वाहतूक विमानांच्या खरेदीसाठी २१,९३५ कोटी रुपयांचा करार केला होता. यापैकी १६ विमाने स्पेनमधून तयार स्थितीत पुरविण्यात येत आहेत, तर उर्वरित ४० विमाने भारतातच तयार करण्यात येणार आहेत.
C-295 हे मध्यम क्षमतेचे सामरिक लष्करी वाहतूक विमान असून ते भारतीय हवाई दलाच्या जुन्या Avro-748 विमानांची जागा घेणार आहे. हे विमान सैनिकांची ने-आण, मालवाहतूक, वैद्यकीय स्थलांतर तसेच विशेष लष्करी मोहिमांसाठी उपयुक्त ठरणार आहे.
या विमानात ७० सैनिक, ४८ पॅराट्रूपर्स किंवा २४ वैद्यकीय स्ट्रेचर्स वाहून नेण्याची क्षमता आहे. दोन शक्तिशाली Pratt & Whitney PW127G टर्बोप्रॉप इंजिन्स असलेल्या या विमानाला कमी अंतराच्या तसेच खडबडीत आणि अर्धविकसित धावपट्ट्यांवरून उड्डाण व लँडिंग करण्याची क्षमता आहे. त्यामुळे डोंगराळ आणि दुर्गम सीमावर्ती भागांमध्ये हे विमान भारतीय सैन्यासाठी अत्यंत उपयुक्त ठरणार आहे.
या यशस्वी उड्डाणामुळे ‘आत्मनिर्भर भारत’ आणि ‘मेक इन इंडिया’ उपक्रमांना मोठे बळ मिळाले असून भारताच्या संरक्षण उत्पादन क्षेत्रातील स्वावलंबनाच्या दिशेने हा एक महत्त्वपूर्ण मैलाचा दगड मानला जात आहे.
