मुंबई
माहिती व जनसंपर्क महासंचालनालयातर्फे प्रकाशित होणाऱ्या ‘आपलं मंत्रालय’ या गृहपत्रिकेच्या जून २०२६ अंकाचे प्रकाशन महिला व बालकल्याण विभागाचे सचिव तथा अतिथी संपादक डॉ. अनुपकुमार यादव यांच्या हस्ते करण्यात आले.
यावेळी सामान्य प्रशासन विभागाचे अवर सचिव (मावज) अजय भोसले, माहिती व जनसंपर्क महासंचालनालयाच्या उपसंचालक (वृत्त) वर्षा फडके-आंधळे तसेच अन्य अधिकारी उपस्थित होते.
‘आपलं मंत्रालय’च्या जून २०२६ अंकामध्ये विविध सामाजिक, सांस्कृतिक, शैक्षणिक, पर्यावरणीय आणि विकासाभिमुख घडामोडींचा सविस्तर आढावा घेण्यात आला आहे. शासनाच्या लोककल्याणकारी धोरणांबरोबरच सांस्कृतिक वारशाचे जतन आणि संवर्धन, शिक्षण, विज्ञान, पर्यावरण तसेच नवकल्पनांच्या क्षेत्रातील सकारात्मक बदलांवर प्रकाश टाकण्यात आला आहे.
बदलत्या काळातील आव्हाने आणि संधी, नागरिकांच्या सक्रिय सहभागाचे महत्त्व अधोरेखित करणारे तसेच ज्ञान, संवेदनशीलता, सामाजिक बांधिलकी आणि विकास यांचा समतोल साधणारे लेख या अंकाचे विशेष आकर्षण ठरत आहेत.
मंत्रालयातील विविध विभागांमध्ये कार्यरत अधिकारी आणि कर्मचारी यांच्या कलागुणांना व्यासपीठ उपलब्ध करून देणे तसेच त्यांना प्रोत्साहन मिळावे या उद्देशाने ‘आपलं मंत्रालय’ या गृहपत्रिकेचा उपक्रम राबविण्यात येत आहे. शासनाच्या विविध उपक्रमांची माहिती नागरिकांपर्यंत पोहोचविण्याबरोबरच प्रशासनातील सकारात्मक कार्याचा परिचय करून देण्याचे महत्त्वपूर्ण कार्य ही गृहपत्रिका करत आहे.
