मुंद्रा विमानतळावरून मुंबई-गोवा पहिली नियोजित विमानसेवा सुरू; कच्छच्या आर्थिक विकासाला चालना

मुंद्रा विमानतळावरून मुंबई-गोवा पहिली नियोजित विमानसेवा सुरू; कच्छच्या आर्थिक विकासाला चालना

अहमदाबाद/मुंद्रा, –

अदानी समूहाच्या मुंद्रा विमानतळाने मंगळवारी मुंबई आणि गोवा यांना जोडणाऱ्या आपल्या पहिल्या नियोजित विमानसेवेची घोषणा केली. स्टार एअरसोबतच्या धोरणात्मक भागीदारीतून सुरू करण्यात आलेली ही सेवा कच्छ प्रदेशाच्या आर्थिक विकासासाठी महत्त्वपूर्ण ठरणार आहे.

अत्याधुनिक टर्मिनलमधून स्टार एअरद्वारे आठ नवीन विमानसेवा सुरू करण्यात आल्या असून त्यामुळे व्यापार, वाणिज्य, लॉजिस्टिक्स आणि पर्यटन क्षेत्राला मोठी चालना मिळणार आहे. या नवीन हवाई संपर्कामुळे प्रवासाचा वेळ कमी होऊन उद्योग आणि व्यावसायिक हालचाली अधिक गतिमान होण्याची अपेक्षा आहे.

मुंबई आणि गोव्याव्यतिरिक्त स्टार एअरद्वारे मुंद्राला हिंडन, सुरत, बेळगावी, बंगळुरू, कोल्हापूर आणि नांदेड या शहरांशीही जोडण्यात आले आहे. त्यामुळे पश्चिम भारतासह देशातील विविध भागांशी मुंद्राचा संपर्क अधिक मजबूत होणार आहे.

भारताचे सर्वात मोठे खाजगी बंदर असलेल्या मुंद्रा बंदराच्या आणि देशातील सर्वात मोठ्या अधिसूचित, कार्यरत बहु-उत्पादक विशेष आर्थिक क्षेत्राच्या (SEZ) विकासाला गती देण्यासाठी हा निर्णय महत्त्वाचा मानला जात आहे. आयात-निर्यात व्यवहारांचे प्रमुख केंद्र म्हणून ओळखल्या जाणाऱ्या मुंद्रा क्षेत्राला या हवाई सेवांमुळे अतिरिक्त बळ मिळणार आहे.

नवीन विमानसेवा सुरू झाल्यामुळे कच्छ प्रदेशातील उद्योग, गुंतवणूक, पर्यटन आणि रोजगारनिर्मितीच्या संधींमध्ये वाढ होण्याची अपेक्षा व्यक्त केली जात आहे.