भारतात अवयवदान चळवळीला मोठे यश; ५ लाख अवयव व ऊतकदान प्रतिज्ञांचा ऐतिहासिक टप्पा पार
भारतात अवयवदान चळवळीला मोठे यश; ५ लाख अवयव व ऊतकदान प्रतिज्ञांचा ऐतिहासिक टप्पा पार
नवी दिल्ली
भारताने अवयव आणि ऊतकदानाबाबत जनजागृती व नागरिकांच्या सहभागामध्ये महत्त्वपूर्ण यश मिळवत ५ लाख अवयव व ऊतकदान प्रतिज्ञांचा टप्पा पार केला आहे. देशातील अवयवदान चळवळीच्या दृष्टीने हा एक ऐतिहासिक आणि महत्त्वाचा मैलाचा दगड मानला जात आहे.
भारतातील अवयव प्रत्यारोपण व्यवस्थेचा सातत्याने विस्तार होत असून, त्याचा सकारात्मक परिणाम प्रत्यारोपणांच्या संख्येतही दिसून येत आहे. २०१३ मध्ये वार्षिक अवयव प्रत्यारोपणांची संख्या ५ हजारांपेक्षा कमी होती. ती वाढत जाऊन २०२५ मध्ये जवळपास २० हजारांपर्यंत पोहोचली असल्याचे सांगण्यात आले आहे.
अवयवदानाबाबत जनजागृती, वैद्यकीय सुविधांचा विस्तार, प्रत्यारोपण केंद्रांची वाढ आणि समन्वय यंत्रणा अधिक सक्षम झाल्यामुळे या क्षेत्रात लक्षणीय प्रगती झाली आहे.
मात्र, या प्रगतीनंतरही प्रत्यारोपणासाठी आवश्यक असलेल्या अवयवांची मागणी उपलब्ध अवयवांच्या तुलनेत अजूनही खूपच जास्त आहे. त्यामुळे अधिकाधिक नागरिकांनी अवयवदानाची प्रतिज्ञा करून या सामाजिक चळवळीत सहभागी व्हावे, असे आवाहन करण्यात येत आहे.
अवयवदानामुळे अनेक गंभीर रुग्णांना नवजीवन मिळू शकते. त्यामुळे समाजात अवयवदानाबाबत सकारात्मक दृष्टीकोन निर्माण करणे आणि जनजागृती वाढविणे ही काळाची गरज असल्याचे आरोग्य क्षेत्रातील तज्ज्ञांचे मत आहे.
