फणसू केंद्रातील २५० विद्यार्थी रमले रंगांच्या दुनियेत!

फणसू केंद्रातील २५० विद्यार्थी रमले रंगांच्या दुनियेत!

केंद्रस्तरीय रंगभरण स्पर्धेत विद्यार्थ्यांच्या सर्जनशीलतेला मिळाले व्यासपीठ; नऊ विद्यार्थ्यांचा विशेष गौरव

दापोली प्रतिनिधी : अरविंद मांडवकर

कागदावर उमटणारे रंग, कल्पनाशक्तीला मिळालेली भरारी आणि आपल्या मनातील भावविश्व चित्रातून साकारण्याचा उत्साह… अशा रंगमय वातावरणात फणसू केंद्रातील तब्बल २५० विद्यार्थी रंगांच्या दुनियेत रमून गेले. विद्यार्थ्यांच्या कलागुणांना वाव देण्यासाठी आयोजित करण्यात आलेल्या केंद्रस्तरीय रंगभरण स्पर्धेला विद्यार्थ्यांचा उत्स्फूर्त प्रतिसाद मिळाला.

फणसू केंद्रातील १० शाळांमधील विद्यार्थ्यांसाठी शनिवार, दि. ८ ऑगस्ट २०२६ रोजी केंद्र शाळा फणसू येथे ही स्पर्धा आयोजित करण्यात आली होती. विद्यार्थ्यांच्या सुप्त कलागुणांना व्यासपीठ मिळावे, त्यांच्या सर्जनशीलतेला प्रोत्साहन मिळावे आणि चित्रकलेच्या माध्यमातून त्यांना व्यक्त होता यावे, हा या उपक्रमामागील उद्देश होता.

स्पर्धा इयत्ता १ली ते २री, इयत्ता ३री ते ५वी आणि इयत्ता ६वी ते ७वी अशा तीन गटांत घेण्यात आली. लहानग्यांपासून मोठ्या विद्यार्थ्यांपर्यंत सर्वांनी उत्साहाने रंगांची उधळण करत आपापल्या कल्पना कागदावर साकारल्या. विद्यार्थ्यांच्या कलाविष्कारामुळे संपूर्ण स्पर्धास्थळाला जणू रंगोत्सवाचे स्वरूप प्राप्त झाले होते.

या विद्यार्थ्यांनी पटकावले मानाचे क्रमांक

इयत्ता १ली ते २री :
🥇 प्रथम – कु. सई बाईत (असोंड)
🥈 द्वितीय – कु. निधी बारे (देगाव)
🥉 तृतीय – कु. मानस जाधव (देगाव)

इयत्ता ३री ते ५वी :
🥇 प्रथम – कु. सुयश म्हाप्रळकर (देगाव)
🥈 द्वितीय – कु. शौर्य पाथरटकर (देगाव)
🥉 तृतीय – कु. तन्मय राळे (रुखी)

इयत्ता ६वी ते ७वी :
🥇 प्रथम – कु. कार्तिकी भागणे (रुखी)
🥈 द्वितीय – कु. आराध्य निकम (फणसू)
🥉 तृतीय – कु. आर्या भागणे (रुखी)

या सर्व विजेत्या विद्यार्थ्यांना सन्मानचिन्ह व प्रशस्तीपत्र देऊन गौरविण्यात आले. तसेच ‘बळीराजा’ संघटनेचे जिल्हाध्यक्ष गणेश देवघरकर यांच्या वतीने विजेत्यांना बक्षिसे प्रदान करण्यात आली.

‘आम्ही विद्यार्थ्यांच्या पाठीशी’

बक्षीस वितरण समारंभात जिल्हा परिषद सदस्य तथा शिक्षण समिती सदस्य प्रभाकर गोलांबडे यांनी विद्यार्थ्यांचे कौतुक करताना सांगितले की, विद्यार्थ्यांच्या कलागुणांना वाव देणारे असे उपक्रम सातत्याने राबविले गेले पाहिजेत. शैक्षणिक गुणवत्तेबरोबरच विद्यार्थ्यांच्या कलात्मक आणि सर्जनशील विकासालाही महत्त्व असून, शाळांच्या समस्या सोडविण्यासाठी शिक्षण समितीच्या माध्यमातून प्रयत्न केले जातील, अशी ग्वाही त्यांनी दिली.

पंचायत समिती सदस्य नरेश घरटकर यांनी विद्यार्थ्यांच्या कलाविष्काराचे कौतुक केले, तर गटशिक्षणाधिकारी रामचंद्र सांगडे यांनी फणसू केंद्राच्या सातत्यपूर्ण यशाचे कौतुक करत विद्यार्थ्यांना पुढील उपक्रमांसाठी शुभेच्छा दिल्या.

स्पर्धेचे पर्यवेक्षण गणेश सूर्यवंशी, सुहास भागवत, मानसी राळे, मायकल झोंबाडे, माधवी पवार आणि नारायण आयरे यांनी केले. विद्यार्थ्यांच्या चित्रांचे परीक्षण मंगेश कडवईकर, अनिता पालवे, शशिकांत सोनवणे, रामकृष्ण लिंगायत, धनश्री मंडोले, हनुमंत कल्याणे, गणेश सूर्यवंशी, जयवंत धुमाळ, सतीश शिबे आणि अनुराधा देसाई यांनी केले.

बक्षीस वितरण समारंभाला प्रभाकर गोलांबडे, नरेश घरटकर, रामचंद्र सांगडे, सरपंच रेखा खोपटकर, केंद्रप्रमुख नामदेव फल्ले, शाळा व्यवस्थापन समिती अध्यक्ष प्रविण बेर्डे यांच्यासह मुख्याध्यापक, शिक्षक व मान्यवर उपस्थित होते.

कार्यक्रमाचे सूत्रसंचालन नितीन गुहागरकर यांनी केले, तर आभार पांडुरंग जाधव यांनी मानले.

रंगांमधून स्वप्ने साकार करणाऱ्या फणसू केंद्रातील या चिमुकल्या कलाकारांनी आपल्या कल्पनाशक्तीची सुंदर झलक दाखवत केवळ चित्रेच रंगवली नाहीत, तर आपल्या कलागुणांना नवे पंख दिले!