‘घरोघरी बाप्पा’ उपक्रमातून गणेशोत्सवाच्या आठवणींचे डिजिटल जतन

‘घरोघरी बाप्पा’ उपक्रमातून गणेशोत्सवाच्या आठवणींचे डिजिटल जतन

महाराष्ट्राच्या सांस्कृतिक वारशाचे डिजिटल जतन करण्यासाठी सांस्कृतिक कार्य विभागाच्या ‘घरोघरी बाप्पा’ उपक्रमांतर्गत महाराष्ट्राचे डिजिटल सांस्कृतिक संग्रह पोर्टल Bappa.org वर आजच्या पाच वैशिष्ट्यपूर्ण गणेशोत्सव कथांची निवड करण्यात आली आहे.

या कथांमध्ये कोकणातील पारंपरिक गौरी-गणपती उत्सव, घरच्या घरी साकारलेली मातीची गणेशमूर्ती, नव्या घरातील पहिला गणेशोत्सव, व्हिएतनाममधील विद्यार्थ्यांनी साजरा केलेला गणेशोत्सव तसेच विसर्जनाच्या मातीतून वृक्षसंवर्धनाचा उपक्रम अशा विविध प्रेरणादायी अनुभवांचा समावेश आहे.

राज्यातील घरे, स्थानिक सार्वजनिक गणेशोत्सव मंडळे, ऐतिहासिक मंदिरे तसेच परदेशातील भारतीय समुदायांच्या गणेशोत्सवातील आठवणींचे या उपक्रमातून डिजिटल जतन करण्यात येत आहे. छायाचित्रे आणि गणेशोत्सवाशी संबंधित माहिती पोर्टलवर सादर करणाऱ्या नागरिक, मंडळ अथवा मंदिर न्यासाला महाराष्ट्र शासनाकडून अधिकृत ‘डिजिटल सांस्कृतिक संवर्धक प्रमाणपत्र’ देण्यात येते. वैशिष्ट्यपूर्ण नोंदींची दररोज निवड करून शासनाच्या माध्यमातून त्यांना प्रसिद्धी दिली जात आहे.