पदवीधर, शिक्षक मतदार नोंदणीची मुदत २६ सप्टेंबरपर्यंत; ऑनलाइन नोंदणीचे पुणे जिल्हाधिकाऱ्यांचे आवाहन
पदवीधर, शिक्षक मतदार नोंदणीची मुदत २६ सप्टेंबरपर्यंत; ऑनलाइन नोंदणीचे पुणे जिल्हाधिकाऱ्यांचे आवाहन
पुणे :
महाराष्ट्र विधान परिषदेच्या पुणे विभाग पदवीधर व शिक्षक मतदारसंघाच्या निवडणुकीच्या पार्श्वभूमीवर पात्र पदवीधर आणि शिक्षक मतदारांना मतदार यादीत नाव नोंदविण्याचे आवाहन पुणे जिल्हाधिकारी जितेंद्र डुडी यांनी केले आहे. दिलेल्या माहितीनुसार, ऑनलाइन नोंदणीची अंतिम मुदत २६ सप्टेंबर २०२६ आहे. मुख्य निवडणूक अधिकारी, महाराष्ट्र यांच्या अधिकृत पोर्टलवर पदवीधर व शिक्षक मतदारसंघासाठी ऑनलाइन नोंदणीची सुविधा उपलब्ध आहे.
अद्याप मतदार म्हणून नोंदणी न केलेल्या पात्र पदवीधर आणि शिक्षकांनी मुदतीपूर्वी नोंदणी पूर्ण करावी. पदवीधर मतदारसंघासाठी पात्र पदवीधरांनी आवश्यक कागदपत्रांसह नमुना १८, तर शिक्षक मतदारसंघासाठी पात्र शिक्षकांनी नमुना १९ अनुषंगाने अर्ज करणे आवश्यक आहे. शिक्षक मतदारांसाठी संबंधित शैक्षणिक संस्थेच्या प्रमुखांचे प्रमाणपत्र आवश्यक असल्याची माहिती निवडणूक विभागाने दिली आहे.
पुणे जिल्हा प्रशासनाच्या निवडणूक शाखेच्या संकेतस्थळावर पुणे विभाग पदवीधर आणि शिक्षक मतदारसंघाच्या मतदार याद्यांशी संबंधित माहिती उपलब्ध आहे.
पात्र नागरिकांनी शेवटच्या दिवसाची प्रतीक्षा न करता ऑनलाइन अर्ज सादर करावा, असे आवाहन जिल्हाधिकारी जितेंद्र डुडी यांनी केले आहे.
