ठाण्यात २८ व २९ ऑक्टोबरला २४ तास पाणीपुरवठा बंद; घोडबंदर रोडसह अनेक भागांना फटका

ठाण्यात २८ व २९ ऑक्टोबरला २४ तास पाणीपुरवठा बंद; घोडबंदर रोडसह अनेक भागांना फटका

ठाणे : एल निनोच्या संभाव्य परिणामांमुळे दुष्काळसदृश परिस्थिती निर्माण होण्याची शक्यता लक्षात घेऊन उपलब्ध पाणीसाठ्याचे नियोजन करण्यासाठी ठाणे महानगरपालिकेने पाणी कपातीचा निर्णय घेतला आहे. त्यानुसार, दर बुधवारी महापालिका क्षेत्रात १० टक्के पाणी कपात लागू करण्यात येणार आहे. तसेच, २८ ऑक्टोबर रोजी सकाळी ९ वाजल्यापासून २९ ऑक्टोबर रोजी सकाळी ९ वाजेपर्यंत ठाण्यातील अनेक भागांचा पाणीपुरवठा २४ तास बंद राहणार आहे.

ठाणे महानगरपालिकेच्या स्वतःच्या पाणीपुरवठा यंत्रणेसह STEM वॉटर डिस्ट्रिब्युशन अँड इन्फ्रास्ट्रक्चर कंपनी प्रा. लि. यांच्या माध्यमातून ही पाणी कपात करण्यात येणार आहे. या कालावधीत शहरातील संबंधित भागांतील नागरिकांना पाणीटंचाईचा सामना करावा लागू शकतो.

या भागांतील पाणीपुरवठा होणार प्रभावित

घोडबंदर रोड, कळवा, लोकमान्य नगर, वर्तक नगर, साकेत, सिद्धाचल, रुस्तमजी, मुंब्रा तसेच इतर संबंधित परिसरांमध्ये पाणीपुरवठा खंडित होणार आहे. पाणीपुरवठा पूर्ववत झाल्यानंतरही काही भागांत कमी दाबाने पाणी मिळण्याची शक्यता असल्याने नागरिकांनी आवश्यक ती खबरदारी घ्यावी.

नागरिकांना पाणी जपून वापरण्याचे आवाहन

उपलब्ध पाणीसाठ्याचे योग्य व्यवस्थापन करण्यासाठी महापालिकेकडून ही खबरदारीची उपाययोजना करण्यात येत आहे. त्यामुळे नागरिकांनी पाणी कपातीच्या कालावधीपूर्वी आवश्यक तेवढा पाणीसाठा करून ठेवावा आणि पाण्याचा काटकसरीने वापर करावा, असे आवाहन करण्यात आले आहे.