Zomato कडून प्लॅटफॉर्म शुल्कात वाढ
आता प्रत्येक ऑर्डरमागे १४.९० रुपये आकारणी
मुंबई : ऑनलाइन फूड डिलिव्हरी क्षेत्रातील आघाडीची कंपनी Zomato ने आपल्या प्लॅटफॉर्म शुल्कात वाढ केली असून, आता ग्राहकांकडून प्रति ऑर्डर १४.९० रुपये आकारले जात आहेत. यापूर्वी हे शुल्क १२.५० रुपये होते. म्हणजेच कंपनीने शुल्कात २.४० रुपयांची वाढ केली आहे. ही माहिती शुक्रवारी कंपनीच्या ॲपवर दिसून आली.
मिळालेल्या माहितीनुसार, हे शुल्क GSTपूर्वीच्या आधारावर आकारले जात असून, करांसह ग्राहकांकडून प्रत्यक्षात अधिक रक्कम घेतली जाणार आहे. काही अहवालांनुसार, GST धरून Zomato चे हे शुल्क १७.५८ रुपये इतके होते.
दरम्यान, Zomato ची प्रतिस्पर्धी कंपनी Swiggy सध्या ग्राहकांकडून GSTसह १४.९९ रुपये इतके प्लॅटफॉर्म शुल्क आकारत आहे. त्यामुळे दोन्ही कंपन्यांमधील शुल्क रचना जवळपास सारखीच झाल्याचे दिसून येत आहे.
सूत्रांच्या माहितीनुसार, Zomato कडून करण्यात आलेली ही शुल्कवाढ अखिल भारतीय स्तरावर लागू करण्यात आली असून, कंपनी कार्यरत असलेल्या सर्व बाजारपेठांमध्ये ती प्रभावी असेल. तसेच, Zomato ने यापूर्वी सप्टेंबर २०२५ मध्येही प्लॅटफॉर्म शुल्कात वाढ केली होती.
ऑनलाइन अन्नवितरण सेवा वापरणाऱ्या ग्राहकांच्या खिशावर या वाढीचा थेट परिणाम होणार असून, प्रत्येक ऑर्डरवरील एकूण खर्चात आणखी वाढ होणार आहे. वाढत्या स्पर्धा आणि महसूल वाढीच्या प्रयत्नांच्या पार्श्वभूमीवर कंपन्या अशा शुल्कातून अतिरिक्त उत्पन्न मिळवण्यावर भर देत असल्याचे चित्र दिसत आहे.