मुंबईत १७ विभागांत १५ टक्के पाणी कपात
मुंबई : मुंबई महानगरपालिकेने ८ आणि ९ डिसेंबर रोजी शहरातील १७ विभागांमध्ये १५ टक्के पाणी कपात जाहीर केली आहे. भांडूप जलशुद्धीकरण केंद्राला पाणीपुरवठा करणाऱ्या तानसा जलवाहिनीवर आवश्यक दुरुस्ती व पाइपलाईन बदलाचे काम हाती घेतले जाणार असल्यामुळे हा निर्णय घेण्यात आला आहे.
हे पण वाचा सिंधुदुर्ग जिल्ह्यात दिव्यांगांची दोन महिन्यांची पेंशन थकली ‘जबाबदार कोण?
तानसा येथून भांडूप जलशुद्धीकरण प्रकल्पापर्यंत पाणी वाहून नेणाऱ्या मुख्य जलवाहिनीच्या काही भागात गळती आणि तांत्रिक बिघाड आढळून आला आहे. त्यामुळे संभाव्य अपघात टाळण्यासाठी तसेच भविष्यातील पाणीपुरवठा सुरळीत ठेवण्यासाठी या जलवाहिनीचा काही भाग बदलण्याचे काम हाती घेण्यात येणार आहे. या दुरुस्तीच्या काळात पाणीपुरवठ्यात तात्पुरती घट होणार असून नागरिकांनी पाण्याचा वापर जपून करण्याचे आवाहन पालिका प्रशासनाने केले आहे.
या दोन दिवसांत मुंबईतील पूर्व आणि पश्चिम उपनगरांतील मिळून १७ विभागांमध्ये टप्प्याटप्प्याने १५ टक्के पाणीपुरवठा कमी करण्यात येणार आहे. विशेषतः निवासी इमारती, वस्ती भाग, लहान उद्योग आणि व्यावसायिक आस्थापनांवर याचा परिणाम होणार आहे. नागरिकांनी आवश्यक तेवढाच पाण्याचा वापर करावा, पाणीसाठा योग्य प्रकारे करून ठेवावा आणि अनावश्यक पाणी वापर टाळावा, असेही आवाहन करण्यात आले आहे.
दुरुस्तीचे काम वेळेत पूर्ण करून १० डिसेंबरपासून पाणीपुरवठा पूर्ववत करण्यात येईल, असा विश्वास पालिका प्रशासनाने व्यक्त केला आहे. मात्र, काही भागांत कमी दाबाने पाणीपुरवठा होण्याचीही शक्यता वर्तवण्यात आली आहे.