अलिबागच्या IESP पहिल्या बॅचमधील ७ विद्यार्थ्यांची नवी मुंबई आंतरराष्ट्रीय विमानतळावर नोकरीसाठी निवड

अलिबागच्या IESP पहिल्या बॅचमधील ७ विद्यार्थ्यांची नवी मुंबई आंतरराष्ट्रीय विमानतळावर नोकरीसाठी निवड

अलिबाग :

रायगड जिल्ह्यातील तरुणांसाठी आनंदाची आणि अभिमानाची बातमी समोर आली आहे. आयईएसपी (IESP) अलिबागच्या पहिल्या बॅचमधील सात विद्यार्थ्यांची नवी मुंबई आंतरराष्ट्रीय विमानतळावर नोकरीसाठी निवड झाली आहे. या यशामुळे विद्यार्थ्यांसह त्यांच्या कुटुंबीयांच्या स्वप्नांना नवी दिशा मिळाली आहे.

पीएनपी एज्युकेशन सोसायटीच्या चित्रलेखा पाटील यांनी या यशाबद्दल आनंद व्यक्त केला. ही केवळ विद्यार्थ्यांची यशस्वी कामगिरी नसून त्यांच्या कुटुंबीयांच्या आकांक्षा पूर्ण होण्याच्या दिशेने टाकलेले महत्त्वाचे पाऊल असल्याचे त्यांनी सांगितले.

प्रतिभा सर्वत्र असते; मात्र योग्य संधी प्रत्येकापर्यंत पोहोचणे आवश्यक आहे, या विचारातून पीएनपी एज्युकेशन सोसायटी रायगड जिल्ह्यातील तरुणांना कौशल्य प्रशिक्षण, आत्मविश्वास आणि रोजगाराभिमुख मार्गदर्शन देण्यासाठी प्रयत्नशील आहे. स्थानिक तरुणांना सक्षम करून त्यांच्या उज्ज्वल भविष्यासाठी संधी निर्माण करणे, हे संस्थेचे प्रमुख ध्येय असल्याचे चित्रलेखा पाटील यांनी स्पष्ट केले.

येत्या तीन ते चार वर्षांत रायगड जिल्ह्यातील पाच हजार तरुणांना प्रशिक्षित करून त्यांना रोजगाराच्या अर्थपूर्ण संधी उपलब्ध करून देण्याचे उद्दिष्ट संस्थेने ठेवले आहे. पहिल्या बॅचमधील सात विद्यार्थ्यांची विमानतळावर नोकरीसाठी झालेली निवड हा या प्रयत्नांमधील महत्त्वाचा टप्पा मानला जात आहे.

विद्यार्थ्यांच्या या यशामुळे तरुणांच्या कौशल्य विकासासाठी आणि रोजगारनिर्मितीसाठी अधिक जोमाने काम करण्याची प्रेरणा मिळत असल्याचेही चित्रलेखा पाटील यांनी सांगितले.