'आर्टी'मार्फत पीएचडी अधिछात्रवृत्तीसाठी अर्ज मागविले; ३ सप्टेंबरपर्यंत संधी
‘आर्टी’मार्फत पीएचडी अधिछात्रवृत्तीसाठी अर्ज मागविले; ३ सप्टेंबरपर्यंत संधी
मुंबई, प्रतिनिधी : डॉ. बाबासाहेब आंबेडकर संशोधन व प्रशिक्षण संस्था (ARTI) मार्फत ‘अण्णा भाऊ साठे राष्ट्रीय संशोधन अधिछात्रवृत्ती’ (ASNFR) योजनेअंतर्गत पीएचडी करणाऱ्या पात्र विद्यार्थ्यांकडून अर्ज मागविण्यात आले आहेत. वर्ष २०२३, २०२४ आणि २०२५ या कालावधीत पीएचडीसाठी कायम नोंदणी (Permanent Registration) असलेल्या विद्यार्थ्यांनी या योजनेचा लाभ घेण्यासाठी अर्ज करावेत, असे आवाहन करण्यात आले आहे.
या अधिछात्रवृत्ती योजनेअंतर्गत संशोधक विद्यार्थ्यांना आर्थिक सहाय्य दिले जाणार आहे. निवड झालेल्या विद्यार्थ्यांना कनिष्ठ संशोधन अधिछात्रवृत्ती (JRF) अंतर्गत दरमहा ३७ हजार रुपये, तर वरिष्ठ संशोधन अधिछात्रवृत्ती (SRF) अंतर्गत दरमहा ४२ हजार रुपये आर्थिक सहाय्य मिळणार आहे.
या योजनेसाठी अर्ज करण्याची अंतिम तारीख ३ सप्टेंबर २०२६ निश्चित करण्यात आली आहे. इच्छुक संशोधक विद्यार्थ्यांनी ऑनलाइन पद्धतीने अर्ज सादर करावेत.
योजनेचा सविस्तर तपशील, पात्रता निकष, मार्गदर्शक सूचना आणि वेळापत्रक जाणून घेण्यासाठी आर्टीच्या अधिकृत संकेतस्थळाला भेट देण्याचे आवाहन करण्यात आले आहे. तसेच संशोधक विद्यार्थ्यांनी निर्धारित पोर्टलवर ऑनलाइन अर्ज भरावेत, असेही स्पष्ट करण्यात आले आहे.
उच्च शिक्षण आणि संशोधन क्षेत्रात कार्यरत विद्यार्थ्यांसाठी ही योजना महत्त्वाची संधी मानली जात असून संशोधनाला प्रोत्साहन देण्यासाठी राज्य शासनाचा हा महत्त्वाकांक्षी उपक्रम असल्याचे सांगण्यात आले.
