एअर इंडिया AI-171 विमान दुर्घटनेचा अंतिम अहवाल कधी? एक वर्षानंतरही प्रतीक्षा कायम

एअर इंडिया AI-171 विमान दुर्घटनेचा अंतिम अहवाल कधी? एक वर्षानंतरही प्रतीक्षा कायम

नवी दिल्ली : अहमदाबादहून लंडन (गॅटविक) येथे जाणाऱ्या एअर इंडियाच्या AI-171 या बोईंग 787-8 ड्रीमलाइनर विमानाच्या भीषण दुर्घटनेला १२ जून २०२६ रोजी एक वर्ष पूर्ण होत आहे. या दुर्घटनेत १६९ भारतीय आणि ५३ ब्रिटिश नागरिकांसह २६० हून अधिक जणांचा मृत्यू झाला होता. टेक-ऑफनंतर अवघ्या ३२ सेकंदांत विमान कोसळल्याने देशासह जगभरात शोककळा पसरली होती.

या दुर्घटनेनंतर विमान अपघात तपास यंत्रणांनी तपास सुरू केला असला तरी, अपघातास कारणीभूत ठरलेल्या नेमक्या कारणांचा सर्वसमावेशक अंतिम अहवाल अद्याप जाहीर झालेला नाही. त्यामुळे मृतांच्या नातेवाईकांसह विमान वाहतूक क्षेत्रातील तज्ज्ञांचे लक्ष या अहवालाकडे लागले आहे.

दरम्यान, फेडरेशन ऑफ इंडियन पायलट्स (FIP) ने सरकारला अपूर्ण किंवा प्राथमिक स्वरूपाचा अंतरिम अहवाल प्रसिद्ध न करण्याचे आवाहन केले आहे. अशा अहवालामुळे गोंधळ निर्माण होऊ शकतो तसेच अपघाताच्या कारणांबाबत अनावश्यक अटकळींना खतपाणी मिळू शकते, असा इशारा संघटनेने दिला आहे.

वैमानिक संघटनेच्या मते, तपास पूर्ण झाल्यानंतर सर्व तांत्रिक, मानवी आणि यांत्रिक बाबींचे सखोल विश्लेषण करूनच अंतिम अहवाल प्रसिद्ध करण्यात यावा. त्यामुळे दुर्घटनेची खरी कारणे समोर येतील आणि भविष्यात अशा घटना टाळण्यासाठी आवश्यक उपाययोजना निश्चित करता येतील.

दरम्यान, एअर इंडियाने पीडित कुटुंबांना तातडीच्या गरजांसाठी २५ लाख रुपयांची अंतरिम मदत देण्यास सुरुवात केली आहे. तसेच टाटा समूहाने ‘AI-171 Memorial and Welfare Trust’ स्थापन करून प्रत्येक मृत व्यक्तीच्या कुटुंबाला १ कोटी रुपयांची सानुग्रह मदत देण्याची घोषणा केली आहे. याशिवाय दुर्घटनेत नुकसान झालेल्या बी. जे. मेडिकल कॉलेजच्या वसतिगृहाच्या पुनर्बांधणीसाठीही मदत केली जाणार आहे.

अपघाताला एक वर्ष पूर्ण होत असताना अंतिम अहवाल कधी जाहीर होणार, याकडे संपूर्ण विमान वाहतूक क्षेत्र आणि पीडित कुटुंबांचे लक्ष लागले आहे.